Hayotning qizg‘in tarafini ijtimoy tarmoqdan oson kuzatish mumkin, “Daryo” bu borada sizga yordam berishda davom etadi. Demak ushbu haftaning boshlarida qanday voqealar ijtimoiy tarmoqda trendda bo‘ldi. Marhamat, o‘qib huzurlaning.
Vodiy qaysi qishda gaz bilan ta’minlanadi?
O‘zining o‘tkir hajvlari va memlari bilan mashhur Rais buva o‘z Telegram-kanalida va Facebook’da bir-biridan ajoyib karikaturalar joyladi-ki, har bir haqida bir sidra kulib, keyin o‘yga tolasiz. Bu memlarini shu tanqid ostiga olingan soha rahbarlari ham o‘qib ko‘risharmikan ishqlib, deb o‘ylaysiz ham. Ha nima bo‘libdi, Rais buvaning tanqidiy karikaturalarini Xalq ta’limi vaziri Sherzod Shermatov o‘z yig‘ilishlarida ham ma’ruzasida foydalanganku? Barcha rahbarlar tanqiddan to‘g‘ri xulosa chiqarishni shunday o‘rgansa arziydi.
Rais buvaning navbatdagi qalampir karikaturalarini tomosha qiling.
Ushbu memni biroz izohlab ketadigan bo‘lsak. Dekabrning naqd 31-sanasida to‘satdan saytlar va masalan Telegram’dagi Davletovuz kanali “O‘ztransgaz” aksiyadorlik jamiyati raisi Bahodir Eshmuratovning “vodiy aholisini qishda o‘chmaydigan gaz bilan ta’minlaymiz, Qozog‘istondan gaz olyapmiz”, deya bayonot berganini yozdi. Hamma xursand, lekin mana bir oy o‘tdi hamki, vodiyning biron joyida aholidan uzilgan gaz qayta ulangani haqida bir og‘iz yangilik yo‘q.
Alisher Sa’dullayevning uzri
Yaqinda press-klub yig‘ilishida jurnalistlar Yoshlar ittifoqi raisining birinchi o‘rinbosari Alisher Sa’dullayevga “uyushmagan yoshlar” atamasini izohlab bering, degan savolga bergan javobi muhokamalarga sabab bo‘ldi. Ijtimoiy tarmoqlar reaksiyasidan so‘ng yosh rahbar yuqori lavozimdagi rahbarlar orasida O‘zbekiston tarixida ilk bor xalqdan o‘z javobi uchun rasmiy uzr so‘rab, Telegram’dagi shaxsiy kanalida va Facebook’dagi sahifasida e’lon qildi.
#Rasman_yoshlarga_uzrimni_yetkazingBu bayonotni o‘qigach, tarmoq foydalanuvchilari Alisherni qo‘llab-quvvatlab, olg‘a intilishga chorladi.#Bir_jaydarichisiga_gaplashaylik
Oxirgi vaqtlar ma’lum shaxslar va tashkilotlar haqida “kreativ” tanqid qilish juda avjiga chiqdi. Har xil olib qochishlar, lag‘mon cho‘zishlar va hokazo. Bu jarayonni kuzata turib, hayron qolasan kishi. Ayniqsa, guruhbozlik va tarafkashlik ko‘p uchrashi va shunchaki odatiy holatlardan biriga aylanib qoldi. Eng qizig‘i, bularning barchasi virtual olamda sodir bo‘lyapti. Keling, aniqroq tahlil qilib bersam. O‘tgan kuni xalqaro press-klubga borgan edim. Shunda “uyushmagan yoshlar” aslida kimlar deya savol berishdi (bu terminga haligacha aniq javob yo‘q, ammo har xil versiyalar bor). Savol juda ham qiziqarli va jamiyatdagi “katta” muammolarni yechib beradigandek tuyuldi shekilli hammaga, birdaniga bu terminni butun ijtimoiy tarmoq muhokama qila boshladi. Tushunaman, haqiqatan ham bu termin trend darajasiga chiqdi va bu savolning press-klubda yangrashi yana bir rezonans berishi aniq edi. Lekin nima o‘zgardi? Qaysidir yosh manfaat oldimi? Yoki uy uchun navbatda turgan yoshlarga uy berildimi? Qaysidir insonning og‘irini yengil qilib berdimi? Mutlaqo yo‘q, shunchaki bitta yosh “aqlli” o‘zi zo‘rg‘a kontraktga (bizda budjet bo‘lmagan) o‘qigan katta tashkilotning birinchi o‘rinbosari press-klubga chiqvolib, hammani uyushmagan yoshga chiqardi. Endi hammasi aniq bo‘ldi, chunki “musaffo osmon” ostidagi barcha yoshlar uyushmaganga chiqarildi, faqat yo‘l chetida terilib turgan bayroqdor yoshlargina uyushgan va ular haq yo‘ldan ketishmoqda. Ular hammasini bilishgan va kutishgan edi va nihoyat shu kun ham keldi. Afsuski, bu sohada #challenge’lar ham jim bo‘ladi, ular heshteg va tadbirni mukammal o‘tkazishadi va biz bundan olam-olam bahra olamiz.
Tahlilim tamom.
Yosh davlat xizmatchilariga yoki endi shu sohani tanlamoqchi bo‘lganlarga bir-ikki og‘iz aytar so‘zim bor. Do‘stlar, bizning yoshlar guruhbozlik, tarafkashlik yoki boshqacha uslubda yashashda davom etar ekan, sizlar davlat ishiga bel boglab, xalq xizmatida bo‘lish, uning hurmatini qozonish, Prezident boshlagan islohotlarga o‘z hissangizni qo‘shish uyoqda tursin, oilangiz, farzandlaringiz va hatto ota-onangizni ham rozi qila olmaysiz. Bizda hali ishni o‘rganib olish uchun vaqt emas yoki tajriba orttirish emas, shunchaki jinoyat qilgan bo‘lasiz. Xorijda siz o‘rgangan va butun dunyo jar solayotgan failure is an inevitable part of success, ya’ni muvaffaqiyat albatta xato bilan bo‘ladi yoki xato bilan shosha-pisha xulosa qilma, undan o‘rgan, degan termin bizda ish bermaydi. Siz mukammal yozishingiz, fikrlashingiz, gapirishingiz va ishlashingiz kerak, bo‘lmasa uyushmagan bo‘lib qolasiz)))
Qisqasi, bu gaplarni holatni juda yaxshi his qilib turgan va sizlarni “uyushgan” yoki “uyushmagan” deb emas, shunchaki aka, opa, uka va singil sifatida ko‘rguvchi oddiy bir yosh aytyapti! Aytgancha, agar davlatimiz rivojiga hissa qo‘shish uchun boshqa yo‘nalishni tanlash imkoni tug‘ilsa, mendan ham o‘rtamiyona bloger va yaxshi tadbirkor chiqib qolar.
Shuningdek, xatoyim uchun, aynan “uyushmagan” terminining xatosi uchun butun yoshlardan rasman uzr va kechirimimni so‘rayman. Juda yaxshi, yana bir dars bo‘ldi. Bu mening nuqsonim va buning takrorlanmasligida qo‘llab-quvvatlashingiz va daldangizga doim muhtojmiz!
Alisher Sa’dullayev
Yo‘llarda tezlikning tushirilishi YTHlar sonini kamaytiradimi?
Bloger Farhod Fayzullayev yurgizib borayotgan Telegram-kanali — “Zambarakning o‘qi”da keng mushohadali post yozdi. Post ostida turli fikrlar bildirildi. Postni keltiramiz, yoqlash-yoqlamaslikni o‘zingiz hal qiling:
2018-yilda O‘zbekiston yo‘llarida 2262 kishi halok bo‘libdi. Kuniga 6 kishi degani. Har kuni kimningdir otasi yo onasi, opasi yo singlisi, akasi yo ukasi, farzandlari mashina g‘ildiraklari tagida halok bo‘lyapti. Bu fojia bo‘lmay nima?Yana egizak farzandlar masalasiAvvalgi postlarimning birida o‘limlarni kamaytirishning usullaridan biri sifatida ruxsat berilgan tezlikni 70 km/soatdan 50 ka tushirishni taklif qilgandim. Dunyoning barcha rivojlangan davlatlarida ushbu tezlik belgilab qo‘yilgan. O‘limlarni kamaytirishning sinalgan yo‘llaridan biri bu, velosiped yaratishning keragi yo‘q!
Bu taklifimga ba’zilar “avval trassalar quraylik, avval yo‘llarni tekislaylik, avval balo qilaylik, avval battar qilaylik, hammayoq probka bo‘p ketadi”, deyishdi. Ha mayli, 25 yildan beri qurilmagan trassalar qurilib qolar, deb umid qilib o‘tiraveraylik, kuniga 6 kishi o‘laversin.
Endi tasavvur qiling, Xudo ko‘rsatmasin, shu 2262 kishi ichida o‘zimizning yaqinlarimiz, jigarlarimiz bor. Sal tezroq yurish uchun ularni qurbon qilishga tayyormizmi? 3—5 daqiqa vaqtliroq chiqib keta olmasdan, o‘rniga birovni qurbon qilishga haqqimiz bormi?
O‘zbeklarimiz o‘zi ja zo‘r-da. Mana, 2 minutda boraman deydi, ammo hali uydan chiqib ketmagan bo‘ladi. Sal vaqtliroq harakat qilaylik, oldindan rejalashtiraylik, sekinroq, e’tiborliroq yuraylik va kuniga 6 kishining jonini saqlab qolaylik.
Menga desa butun Toshkent probka bo‘lib ketmaydimi! Nahotki 2262 kishining joni qayoqdagi probka yoki 5 minut ko‘proq yurishdan qadrsiz bo‘lsa?!
Hozir nima bo‘lsa Singapurni maqtash, unga solishtirish moda bo‘lgan. Singapur bunday tartibga qanday erishdi? Bunday tartibga erishishda katta jarimalarning o‘rni yuqori. Men ham O‘zbekistonni Singapurdek bo‘lishini xohlayman; qonunni buzsam, katta jarima to‘lashga ham roziman. Shahar ko‘chalarining har bir santimetri kamera bilan nazorat qilinishi tarafdoriman. Zora o‘pkasi yo‘q, noinsof, birovga tupurib qo‘ygan olifta-yu ifloslar jarimani to‘layverib, oxiri ba’zi joyini qisib qolsa.
Shu kunlarda uch egizak ko‘rgan va yaxshi niyat bilan Shavkat, Miirziyo, Miromon ismlarini qo‘ygan ota-onalarga Cobalt avtomashinalari berilgani haqida xabarlarni ko‘pchilik o‘qidi. Huquqshunos va bloger Xushnudbek Xudoyberdiyev o‘z Telegram-kanalida yozishicha, o‘tgan yilning sentabr oyida Paxtaobod tumanida dunyoga kelgan, Shavkat, Miromon va Mirziyo deya ism qo‘yilgan uch nafar egizakka Andijon viloyati hokimligi Spark avtomashinasini sovg‘a qilibdi.
Daryo Live Telegram-kanali Prezidentga havas qilib, ismlar qo‘yilgan, lekin hali sovg‘aga mashina berilmagan uch nafar egizaklarning o‘ziga xos ro‘yxatini tuzib chiqdi. Ushbu ro‘yxat bilan kanalda tanishishingiz mumkin.
Darvoqe, oradan bir muddat o‘tib, ro‘yxatga kirgan andijonlik egizaklarga viloyat hokimi tomonidan Spark sovg‘a qilindi.
Bu voqealarga nisbatan ijtimoiy tarmoqda turli fikrlar bildirildi.
Kosa tagida nimkosa
Quyidagi hazil postlar bir qarashda shunchaki hazilday tuyulsa ham, bizningcha, jiddiy muammolarni ko‘tarib chiqqan:
Twitter’da, har doimgiday, ko‘proq sport yangiliklari muhokama qilindi.
Эшакни миниб кетаётганингизда, "эшакка жабр қилаётганингиз"ни уқтирувчилар чиқади. Ажабланманг, улар сиз минган жонзотнинг дўстлари бўлиши мумкин.
— Xayrulla Hamidov (@X_Hamidov) January 29, 2019
Қани энди болаликка қайтиб қолсак. Энг катта ярамиз тиззамиздаги яра бўларди ҳолос...
— Anνarσν (@Asilbek_7) January 27, 2019
Р.Карлос билан матбуот анжуманидаги савол жавобларни укиб роса кулибманей! Сизниям ичиз кетадими деб сураш колиб кетибди. Мля...
— mamurjon (@mamriniio) January 28, 2019
Р.Карлос тахминан: Тошкент жуда чиройли шаҳар экан, одамлари меҳмондўст, ўзбек таомлари жуда ширин, деб эшитганман. Терма жамоангиз Купер билан албатта ЖЧга чиқади, ҳозир улкан ислоҳотлар амалга оширлаётганига гувоҳ бўлдим, деса керак)
— Жасурбек Норметов... (@JasurNormetov) January 28, 2019
Манга Эроннинн шарманда бўлиб тугатгани ёқди: Сардор ўзича, кубоккача 7 та ўртоқлик ўйинини ўтказгани келдик, деганди.
— Xayrulla Hamidov (@X_Hamidov) January 28, 2019
Ijtimoiy tarmoqlardagi rang-barang fikrlarni “Daryo”da kuzatishda davom eting.
Izoh (0)