Tojikiston chegara xizmati: Afg‘oniston bilan chegaralarimizda IShID jangarilari to‘planishi kuzatilmagan

Tojikistonning Afg‘oniston bilan chegarasida IShID jangarilari to‘planishi kuzatilmagan. Bu haqda mamlakat chegara xizmati bayonotida ma’lum qilingan, deya xabar beradi Asia-Plus.

“Bugungi kunda tojik—afg‘on chegarasida yetarlicha kuch va vositalar to‘plangan, chegaraga qo‘shimcha qo‘shin va texnikani ilgari surishga zarurat yo‘q. Shuningdek, ikkinchi liniyada mamlakat Mudofaa vazirligi harbiy bo‘linmalari joylashtirilgan”, — deyiladi bayonotda.

Hujjatda Tojikiston va Afg‘oniston chegarachilari o‘rtasida tig‘iz va barqaror hamkorlik o‘rnatilgani, ikki davlat chegaralari yaqinida IShID a’zolari paydo bo‘lganida bu haqda ma’lumot olinishi bildirilgan.

Eslatib o‘tamiz, oldinroq Rossiya ichki ishlar vazirining o‘rinbosari Igor Zubov IShID jangarilari vertolyotlarda Pokistondan Tojikiston chegarasiga yetkazilayotganini da’vo qilgandi.