Тожикистон чегара хизмати: Афғонистон билан чегараларимизда ИШИД жангарилари тўпланиши кузатилмаган

Тожикистоннинг Афғонистон билан чегарасида ИШИД жангарилари тўпланиши кузатилмаган. Бу ҳақда мамлакат чегара хизмати баёнотида маълум қилинган, дея хабар беради Asia-Plus.

«Бугунги кунда тожик—афғон чегарасида етарлича куч ва воситалар тўпланган, чегарага қўшимча қўшин ва техникани илгари суришга зарурат йўқ. Шунингдек, иккинчи линияда мамлакат Мудофаа вазирлиги ҳарбий бўлинмалари жойлаштирилган», — дейилади баёнотда.

Ҳужжатда Тожикистон ва Афғонистон чегарачилари ўртасида тиғиз ва барқарор ҳамкорлик ўрнатилгани, икки давлат чегаралари яқинида ИШИД аъзолари пайдо бўлганида бу ҳақда маълумот олиниши билдирилган.

Эслатиб ўтамиз, олдинроқ Россия ички ишлар вазирининг ўринбосари Игорь Зубов ИШИД жангарилари вертолётларда Покистондан Тожикистон чегарасига етказилаётганини даъво қилганди.