Gaz hajmi to‘g‘risidagi talabnomalarga izoh berildi
2019-yil 1-yanvar holatiga ko‘ra, O‘zbekistonda avtomobillarga gaz to‘ldirish kompressor shoxobchalari (AGTKSh) soni 692 tani tashkil etgan, joriy yilda yana 15 ta shoxobcha qurilishi uchun ruxsat berilgan. Ayrim manbalarda “O‘ztransgaz” aksiyadorlik jamiyati mavjud shoxobchalarda oylik limit miqdorini 12 dan 17 foizgacha qisqartirgani aytilmoqda. Bu hududlardagi gaz quyish shoxobchalarida narx-navoning o‘zboshimchalik bilan oshirishga sabab bo‘ladimi? O‘zA nashri mazkur savolga javob berdi.
“O‘ztransgaz” aksiyadorlik jamiyatidan ma’lum qilishlaricha, “O‘ztransgaz” har yili 1-sentyabrga qadar iste’molchilarning zaruriy gaz hajmlari to‘g‘risidagi talabnomalarini yig‘ib, ularni “O‘zbekneftgaz” aksiyadorlik jamiyatiga kiritadi.
“O‘zbekneftgaz” ham o‘z navbatida har yili 1-avgustgacha bo‘lgan muddatda kelgusi yil uchun tabiiy gazni qazib olish, qayta ishlash, uzatish, saqlash, taqsimlash bilan bog‘liq gazga bo‘lgan ehtiyoj va texnologik yo‘qotishlarni aniqlaydi.
Xulosalar 15-sentabrga qadar Iqtisodiyot va sanoat vazirligiga taqdim etiladi. Vazirlik tomonidan tabiiy gaz balansi resurs hajmlari taqsimoti (oylik, yillik shaklda) tasdiqlanib, “O‘zbekneftgaz”ga, so‘ng ijrosini ta’minlash uchun “O‘ztransgaz”ga yetkaziladi.
“O‘ztransgaz” mazkur (oylik, yillik shakldagi) tabiiy gaz balans hajmlarini hududiy gaz ta’minoti filiallari kesimida hududlardagi AGTKShning iste’mol qilgan gaz hajmlaridan kelib chiqib, mutanosib ravishda taqsimlaydi, filiallarga jo‘natadi.
Hududiy gaz ta’minoti filiallari esa, har bir iste’molchi kesimida resursni taqsimlab, ular bilan belgilangan tartibda tabiiy gaz yetkazib berish shartnomalarini imzolaydi.Shunga ko‘ra, iste’molchilarni gaz bilan barqaror ta’minlash, uzilishlarning oldini olish, eng asosiysi, mo‘tadil narx siyosatini yuritish choralari ko‘rilmoqda.
Xususan, O‘zbekiston tabiiy gaz iste’molchilarini barqaror tabiiy gaz bilan ta’minlash maqsadida hududiy gaz ta’minoti filiallarida kecha-yu kunduz xizmat ko‘rsatadigan Avariya dispetcherlik xizmatlaridan tashqari, qo‘shimcha muhandis texnik xodimlardan iborat – Avariya tiklash brigadalari tashkil qilingan. Ular kerakli asbob-anjomlar, mashina mexanizmlar, payvandlash agregatlari va boshqa zaruriy texnik vositalar hamda material texnik resurslar bilan to‘la ta’minlangan.Shuningdek, barcha gaz taqsimlash punktlarida navbatdan tashqari rejim sozlash ishlari o‘tkazilib, kunlik nazorat o‘rnatilgan. Aholi xonadonlarida tabiiy gazdan oqilona va xavfsiz foydalanish, is gazidan zaharlanishning oldini olish bo‘yicha teleradio va matbuotda muntazam targ‘ibot-tashviqot ishlari olib borilmoqda.
Bosh Prokuratura huzuridagi Majburiy ijro byurosi hamda “O‘zdavneftgazinspeksiya”ning hududiy bo‘linmalarining joylardagi xodimlari bilan gaz ta’minoti filiallari hamkorlikda gazdan oqilona va tejamkorlik bilan foydalanish, gazdan noqonuniy foydalanilayotgan iste’molchilarni aniqlash, debitor qarzdorlikni kamaytirish bo‘yicha chora-tadbirlar ishlab chiqilgan. Ayni vaqtda hududlarda bu boradagi ishlar izchil davom ettirilmoqda.
