Axborot texnologiyalari va kommunikatsiyalarini rivojlantirish vazirligining tashabbusi bilan jinoiy va ma’muriy qonunchilikka kiritilgan o‘zgartirishlar anonimayzer, proksi-server va VPN’dan foydalanuvchilarga qarshi yo‘naltirilmagan. Bu haqda O‘zbekiston Oliy Majlisi Qonunchilik palatasining innovatsion rivojlanish, axborot siyosati va axborot texnologiyalari masalalari bo‘yicha qo‘mitasi raisi Ilhom Abdullayev ma’lum qildi, deb yozadi Turon24.
“Gap telekommunikatsiya tarmoqlariga qasddan ruxsatsiz kirish haqida bormoqda. “Ruxsatsiz kirish” tushunchasi Ma’muriy javobgarlik to‘g‘risidagi kodeks hamda Jinoyat kodeksiga ham kiritilgan. Biz hech qanday yangilik yaratmadik. Shunday bo‘lganda ham ushbu ta’qib muayyan doirada mavjud bo‘lar edi”, – dedi deputat.
“Ya’ni, shaxs maxsus vositalar orqali telekommunikatsiya tarmog‘iga ataylab kiradi va undan internetning xalqaro trafigiga noqoquniy ravishda ulanish uchun foydalanadi. Buni tasodifan amalga oshirishning iloji yo‘q”, – deb ta’kidladi qo‘mita rahbari.
Ilhom Abdullayevning ta’kidlashicha, Jinoyat kodeksining yangi moddasida (2787-modda. Telekommunikatsiya tarmog‘idan qonunga xilof ravishda (ruxsatsiz) foydalanish) o‘rnatilgan himoya tizimlarini chetlab o‘tgan holda telekommunikatsiya tarmog‘idan foydalanish va xalqaro trafikni o‘tkazish maqsadida telekommunikatsiya tarmog‘idan qonunga xilof ravishda foydalanish, shuningdek mazkur maqsadlar uchun mo‘ljallangan maxsus dasturiy yoki apparat vositalarini qonunga xilof ravishda saqlash va ularning faoliyat ko‘rsatishi uchun sharoit yaratish jinoiy javobgarlikka sabab bo‘ladi.
Deputatning so‘zlariga ko‘ra, telekommunikatsiya tarmoqlariga ruxsatsiz ulanish holatlari so‘nggi vaqtlarda juda ko‘payib ketdi va bu qonunchilikka o‘zgartirishlar kiritishga sabab bo‘ldi.
Qo‘mita rahbari, shuningdek, ushbu jinoyat bir guruh shaxslar tomonidan oldindan til biriktirib sodir etilishi mumkinligini ham aytdi. “VPN texnologiyalarini siz bir guruh shaxslar kelishuvi bilan bajara olmasligingiz aniq, gap jinoyatning boshqa turi haqida bormoqda”, – dedi deputat.
Avgust oyida axborot texnologiyalari va kommunikatsiyalarini rivojlantirish vazirligi Qonun hujjatlari ta’sirini baholash tizimi – SOVAZ portalida telekommunikatsiya tarmog‘iga noqonuniy kirganlik uchun ma’muriy va jinoiy javobgarlikni joriy etishni nazarda tutuvchi hujjat loyihasini e’lon qildi. Taklif etilgan o‘zgarishlar jamoatchilikning salbiy munosabatiga sabab bo‘ldi. Kiritilgan o‘zgartirishlarni foydalanuvchilarning VPN-tarmoq va proksi-serverlar orqali ma’lumot olishini cheklashga urinish sifatida qabul qilishdi. Keyinchalik AKT vazirligi ushbu xabarni rad etib, o‘zgartirishlar ayrim OAVlarda noto‘g‘ri sharhlanganini aytdi.
Izoh (0)