Pepsi Superliga. “Lokomotiv” “Bunyodkor”ni taslim qildi, AGMK esa “So‘g‘diyona”ga javobsiz 2 ta gol urdi

Bugun, 23-sentabr sanasida futbol bo‘yicha O‘zbekiston Pepsi Superligasining 2-bosqich 24-tur uchrashuvlari doirasida uchta bellashuv bo‘lib o‘tishi belgilangan edi. Ulardan ikkitasi o‘z nihoyasiga yetdi.

Turning markaziy o‘yini Toshkentda kechdi. Chempionlik uchun kurashayotgan ikki jamoa — “Lokomotiv” hamda “Bunyodkor” o‘zaro kurash olib bordi. Uchrashuvda hisob 3-daqiqada Temurxo‘ja Abduholiqov tomonidan ochildi. 35-daqiqada Xurshid G‘iyosov “Bunyodkor”ning javob golini kiritdi. Ikkinchi bo‘limning 48-daqiqasida Husniddin G‘ofurov “Loko”ga uch ochko keltirgan golga mualliflik qildi. Shu tariqa hisob 2:1 hisobida “temiryo‘lchilar” foydasiga hal bo‘ldi.

Olmaliqda esa Pepsi Superligada qolish uchun kurashayotgan AGMK Jizzaxning “So‘g‘diyona” klubini qabul qilib, 2:0 hisobida g‘alaba qozondi.

Ayni damda turning so‘nggi uchrashuvi “Navbahor” hamda “Metallurg” jamoalari o‘rtasida bo‘lib o‘tmoqda.