Sog‘liqni saqlash vazirligi: endi har bir ayolga malakali akusherlik va ginekologik ambulator yordam ko‘rsatiladi

2018-yil 2-fevralda imzolangan “Xotin-qizlarni qo‘llab-quvvatlash va oila institutini mustahkamlash sohasidagi faoliyatni tubdan takomillashtirish chora-tadbirlari to‘g‘risida”gi Prezident Farmoni hamda Vazirlar Mahkamasining 2018-yil 10-mayidagi “Qizlar va fertil yoshidagi ayollarga ko‘rsatiladigan akusher-ginekologik va tibbiy yordam xizmatlari samaradorligini oshirish chora-tadbirlari to‘g‘risida”gi qarori ijrosi doirasida butun O‘zbekiston bo‘ylab ayollar maslahatxonalari ochildi. Bu haqda Sog‘liqni saqlash vazirligi matbuot xizmati xabar berdi.

– Ayollar maslahatxonalari Qoraqalpog‘iston Respublikasi va viloyatlar, tuman, shahar markaziy ko‘p tarmoqli poliklinikalari, oilaviy poliklinikalar va qishloq vrachlik punktlari, shuningdek, Toshkent shahrining oilaviy poliklinikalari tuzilmasida tashkil etildi, – deydi Sog‘liqni saqlash vazirligi Onalik va bolalikni muhofaza qilish bosh boshqarmasi boshlig‘i Marat Sodiqov. –  Bundan asosiy maqsad homiladorlikka qadar, homiladorlik hamda tug‘uruqdan keyingi davrda malakali akusherlik va ginekologik ambulator yordam ko‘rsatishdir. Shuningdek, ushbu maslahatxonalar o‘ziga biriktirilgan hudud aholisining reproduktiv salomatligini asrash hamda oilani rejalashtirish orqali ona va bola salomatligini ham muhofaza qiladi.

Endilikda ayollar salomatligi doimiy nazoratga olinadi, bu boradagi muammolarni erta bartaraf etish choralari ko‘rib boriladi.