UzReport axborot agentligi (UzReport-TV va Futbol-TV) Italiya A Seriyasi va UEFA Millatlar ligasi, UEFA Superkubogi musobaqasining O‘zbekiston Respublikasi hududida translyatsiya qilish huquqini sotib oldi, deb agentlik rasmiy sayti xabar bermoqda.
Joriy yildagi Yevropa futbol mavsumining yakuniy bahsi 15-avgust kuni Estoniya poytaxti Tallin shahrida bo‘lib o‘tadi. O‘yin UzReport-TV va Futbol-TV telekanallarida jonli efirda uzatiladi. Bu yil sovrin uchun Madridning “Real” va “Atletiko” klublari kurashadi.
Italiya A Seriyasining 2018/19-yilgi mavsum uchrashuvlari 19-avgustdan boshlanadi va kelgusi yil 26-mayiga qadar davom etadi.
UEFA Millatlar Ligasi Yevropaning milliy terma jamoalari o‘rtasida o‘tkaziladigan yangi xalqaro turnir. Musobaqada 55 ta terma jamoa ishtirok etadi.
Yangi musobaqaning birinchi mavsumi 2018/19-yillarda bo‘lib o‘tadi. Guruh bosqichi 2018-yil sentabr-noyabr oylarida, final bosqichi esa 2019-yilning yozida o‘tkaziladi.
Ta’kidlash joiz, ushbu turnirda g‘olib chiqqan terma jamoalarga Yevro—2020 ga 4 ta yo‘llanma taqdim etiladi, shu bilan birga, an’anaviy saralash o‘yinlariga 20 ta to‘g‘ridan to‘g‘ri yo‘llanma ham beriladi.
Musobaqa formatiga ko‘ra, barcha 55 ta jamoa JCh—2018 yakunlari bo‘yicha reytingdagi o‘rniga qarab 4 ta liga bo‘yicha bo‘linadi (A, D, C va D). “A” ligada Yevropaning Top-12 ta terma jamoasi ishtirok etadi. Qolgan 12 ta terma jamoa “B” ligaga yo‘l olsa, “C” ligada 15 ta terma jamoa, “D” ligada esa 16 ta terma jamoa qatnashadi.
Izoh (0)