O‘zbekistonda tadbirkorni taftish qilish 30 kundan oshmasligi belgilab qo‘yildi

Endi tadbirkorlarni taftish qilish 30 kundan oshmaydi, deb xabar beradi Savdo-sanoat palatasi matbuot xizmati.

Ilgari taftish muddati belgilanmaganligi sababli ushbu jarayon bir necha oylab davom etishi ham mumkin edi.

Mazkur tartib yaqinda Prezident tomonidan imzolangan “O‘zbekiston Respublikasining Jinoyat, Jinoyat-protsessual va Ma’muriy javobgarlik to‘g‘risidagi kodekslariga o‘zgartish va qo‘shimchalar kiritish haqida”gi Qonunda o‘z aksini topgan.

Zarur bo‘lganda bu muddat Bosh prokurorning yoki uning o‘rinbosarining roziligiga ko‘ra yoxud sudning ajrimi bilan yana 30 kunga uzaytirilishi mumkin.

Shuningdek, endilikda tadbirkorlik faoliyati bilan bog‘liq faktlar bo‘yicha tadbirkorlarga nisbatan jinoyat ishini qo‘zg‘atishga faqat Qoraqalpog‘iston Respublikasi prokurorining, viloyatlar va Toshkent shahar yoxud O‘zbekiston Respublikasi Bosh prokurori yoki uning o‘rinbosarining roziligi bilan amalga oshiriladi.