Farg‘ona viloyatining Oltiariq tumanida “Smart kids Oltiariq” yangi nodavlat maktabgacha ta’lim muassasasi foydalanishga topshirildi. Bu haqda “Daryo”ning Farg‘onadagi muxbiri xabar berdi.
Sobiq 44-maktabgacha ta’lim muassasasi binosi shu kungacha qarovsiz qolib, xarobaga aylangan edi. Bino tadbirkor Muhammadjon Abdurahmonovga xususiy bog‘cha faoliyatini yo‘lga qo‘yish maqsadida “nol” xarid qiymatida berildi. Qisqa fursatda 3 milliard so‘mlik rekonstruksiya ishlari amalga oshirildi va qo‘shimcha inshootlar qurildi.
Xorijiy tillarga ixtisoslashtirilgan ushbu bolalar bog‘chasi 210 o‘ringa mo‘ljallangan. Nodavlat maktabgacha ta’lim muassasasida tarbiyalanuvchilar uchun sport zali, musiqa xonasi, zamonaviy oshxona, o‘yin maydonchasi, kichik basseyn, kutubxona, yozgi ayvonchalar mavjud. Barcha xonalar zamonaviy yumshoq mebel hamda o‘yinchoqlar bilan to‘liq ta’minlandi.
Bu yerda bolalarga yo‘l harakati qoidalari innovatsion loyiha asosida o‘rgatiladi. Muassasaning mashg‘ulotlar maydonida maxsus avtodrom bo‘lib, unda bolalar kichik mashinachalarni boshqarish, tabiiy ishlab turadigan svetoforlar yordamida piyodalar yo‘lakchasidan kesib o‘tish kabi amaliy harakatlar orqali yo‘l qoidalari bo‘yicha ilk ko‘nikmalarni oladi.
Bog‘cha o‘ziga xos smart-sinfga ega. “Bilimdon” kompyuter dasturi o‘rnatilgan ko‘rgazmali vositalar tarbiyalanuvchilarning intellektual salohiyatini o‘stirishga xizmat qiladi.
Muassasa mudirasi Dildora Otaqo‘ziyevaning ma’lum qilishicha, tez orada barcha xonalar zamonaviy raqamli videokuzatuv hamda qayd etish kameralari bilan jihozlanadi. Shu orqali ta’lim-tarbiya jarayoni to‘liq nazoratga olinadi.
Izoh (0)