Rossiya Tergov qo‘mitasining Zabaykale o‘lkasi boshqarmasi millatchilik asnosida Markaziy osiyolik 8 kishini o‘ldirganlik, yana 7 kishini o‘ldirishga qasd qilganlikda ayblanayotgan Chita shahrida yashovchi 45 yashar erkakka nisbatan tergovni yakunladi. Bu haqda boshqarma matbuot xizmati xabar berdi.
U o‘z qotilliklarini 2006-yildan 2014-yilgacha amalga oshirgan. Buning uchun IJ-79 to‘pponchasi va Kalashnikov avtomatidan foydalangan.
Tergovga ko‘ra, ayblanuvchi 2006-yil iyulida mevalar sotuvchisi bo‘lgan ikki kishini o‘ldirgan. 2013-yil may oyida esa 4 nafar muhojirni o‘ldirib, birini yaralagan. O‘sha yili noyabr va dekabr oylarida Chitada meva sotuvchilarga hujum uyushtiradi va ulardan biriga og‘ir jarohat yetkazadi.
Kelgusi yil yanvarida esa yana meva sotuvchiga hujum qilib, to‘pponchasidan otib tashlaydi. 2016-yil iyulida taniqli bayker Roman Chipizubovning qotiliga aylanadi.
Sudlanuvchi o‘z aybini inkor etmoqda. Barcha ayblovlar bo‘yicha unga umrbod qamoq jazosi berilishi mumkin.
Izoh (0)