Keyingi paytlarda ijtimoiy tarmoqlarda nojo‘ya so‘zlarni yozishdan tortinmaydigan, ichki ishlar organlari faoliyatini yaxshilashga aloqador bo‘lmagan izoh bildiradigan kimsalar paydo bo‘lmoqda. Bu haqda Ichki ishlar vaziri o‘rinbosari — Toshkent shahar IIBB boshlig‘i general-mayor Rustam Jo‘rayev Yakkasaroy tumani aholisi bilan bo‘lib o‘tgan ochiq muloqotda ma’lum qildi, deya
xabar beradi IIBB matbuot xizmati.
Foto: “Gazeta.uz”Uning so‘zlariga ko‘ra, huquq-tartibot organlari xodimlarini ijtimoiy tarmoqlarda haqoratlayotgan foydalanuvchilar javobgarlikka tortiladi.
“Agar kimda-kim, meni baribir topa olishmaydi, istagancha ichki ishlar organi xodimini haqorat qilaman, tuhmat qilaveraman, deb o‘ylasa qattiq yanglishadi. Shu yo‘nalishda ishlar olib borilgan, buning uchun ma’muriy, hatto jinoiy javobgarlikka tortilgan ijtimoiy tarmoq foydalanuvchilari ham yo‘q emas”, — dedi R. Jo‘rayev.
Xususan, Surxondaryo viloyatida yashovchi 24 yoshli X.J. atayin Toshkent shahar IIBB xodimining g‘ururini toptagani uchun ma’muriy javobgarlikka tortildi. Shayxontohur tuman ma’muriy sudining qaroriga ko‘ra, unga eng kam ish haqining 10 barobari, ya’ni 1 722 400 so‘m miqdorida jarima solindi.
Ushbu sud tomonidan joriy yilning fevral oyida Toshkentda yashovchi, 1987-yilda tug‘ilgan fuqaro K.A.ga 172 240 so‘m miqdorida jarima solindi. Bu ayol ichki ishlar organi xodimini haqorat qilgani uchun, shuningdek, ma’muriy javobgarlikka ham tortildi.
Toshkent shahar IIBB ichki ishlar organlari xodimlarini obro‘sizlantirgan, kamsitgan, haqoratlagan va nafsoniyatiga tekkan barcha fuqarolar, jumladan internetdagi ijtimoiy tarmoq foydalanuvchilariga nisbatan jinoiy javobgarlikkacha bo‘lgan qonuniy chora ko‘rilishini rasman ma’lum qildi.
IIBB qoshida tashkil etilgan Axborot multimedia markazi ijtimoiy tarmoqlarda qoldiriladigan xabarlar, izohlarni monitoring qilib, ichki ishlar organlari xodimlari faoliyatini qadrsizlantiradigan asossiz va yolg‘on ma’lumotlarga raddiya berib boradi.
Toshkent shahar IIBB barcha fuqarolarni ijtimoiy tarmoqlarda muloqotning odob-axloq normalariga amal qilish, bir-biriga hurmat bilan munosabatda bo‘lish, nojo‘ya so‘zlardan foydalanmaslik va ayniqsa, u yoki bu voqeaga izoh qoldirayotganda qo‘pollashmaslik, haqorat qilmaslikka chaqirdi.
Izoh (0)