Oq uy Ivanka Tramp va Kim Chen Inning singlisi o‘rtasida uchrashuv bo‘lib o‘tishi haqidagi mish-mishlarni rad etdi
AQSh vitse-prezidenti Mayk Pens va Amerika prezidentining qizi Ivanka Tramp Pxyonchxandagi Olimpiya o‘yinlari chog‘ida Shimoliy Koreya yetakchisining singlisi Kim Yo Chjon bilan uchrashishni rejalashtirmayapti. Bu haqda Oq uy ma’lum qildi, deb yozadi “Interfaks”.
“Hech qanaqa uchrashuv rejalashtirilmayapti”, — dedi Oq uy matbuot kotibi o‘rinbosari Raj Shayx jurnalistlarning tegishli savoliga javoban.
KXDR delegatsiyasi Koreya Respublikasiga 9-fevral, juma kunining ikkinchi yarmida Pxenyandan uchib keladi. Unga KXDR Oliy xalq yig‘ini (parlament) prezidiumi raisi Kim Yon Nam rahbarlik qiladi. Shimoliy Koreya Mehnat partiyasi markaziy qo‘mitasi targ‘ibot bo‘limi rahbari o‘rinbosari lavozimida faoliyat yurituvchi Kim Yo Chjon 22 yuqori mansabdor shaxsdan iborat delegatsiya tarkibiga kiradi. Shimoliy Koreya delegatsiyasining tashrifi uch kun davom etishi kutilmoqda.
Avvalroq AQSh vitse-prezidenti Maykl Pens 9-fevral kuni KXDR rasmiy rahbari Kim Yon Nam bilan uchrashishi mumkinligi xabar berilgan edi.
