Bobur avlodlari Hindiston, Pokiston va Angliyada istiqomat qilmoqda

Zahiriddin Muhammad Bobur avlodlari dunyoning qaysi mamlakatlarida yashaydi? Bu haqda O‘zA muxbiri bilan suhbatda “Bobur” xalqaro jamoat fondi direktori Zokirjon Mashrapov ma’lumot berdi.

— Bugungi kunda Boburning eng yaqin avlodlari Hindiston, Pokiston va Angliyada istiqomat qiladi.

Pokiza Sultonbegim yangi Dehlida yashaydi. Markaziy kutubxonani bir necha yillar boshqargan. Uning singlisi Tohira Sultonbegim Angliyada istiqomat qiladi. Shoiraning bir necha kitoblari chop etilgan. Ushbu kitoblarning namunalari O‘zbekistonda mamlakatimizdagi “Bobur va jahon madaniyati qo‘lyozma asarlari” muzeyida ham saqlanadi.

Laylo Ummaxonim 5 nafar farzandlari bilan Haydarobodda yashaydi. Bobur avlodiga mansub bo‘lgan bu oilaning Abror ismli vakili Toshkent davlat texnika universitetida “Bobur” xalqaro jamoat fondi homiyligida 5 yil tahsil olgan.

Joriy yilning 14-fevral kuni Andijon shahrida Bobur tavalludining 535 yilligiga bag‘ishlangan ilmiy konferensiya bo‘lib o‘tadi. Mazkur anjumanga qo‘shni mamlakatlardan ham boburshunos olimlar va mehmonlar kelishi ko‘zda tutilgan.