O‘zbekiston Prezidenti Shavkat Mirziyoyev 5-yanvar kuni Toshkent viloyatini aylandi. Tashrif davomida xalq deputatlari viloyat Kengashining navbatdan tashqari sessiyasi bo‘lib o‘tdi. Unda Prezident nutq bilan chiqish qildi. Manbalarning xabar berishicha, videoselektor shaklida o‘tgan yig‘ilishda ko‘plab tashkiliy masalalar ko‘rilgan.
Ishdan olinganlar
Viloyat prokurori va bosh militsioneri ishdan ketadi. “Xabar.uz” xabariga ko‘ra, Prezident sessiya davomida O‘zbekiston bosh prokurori Ixtiyor Abdullayevga Toshkent viloyati prokurorini, ichki ishlar vaziri Po‘lat Bobojonovga esa viloyat IIB boshlig‘ini ishdan olish haqida topshiriq bergan. “Kun.uz”ning o‘z manbasiga asoslanib xabar berishicha, viloyat prokurori Ulug‘bek Sunnatov va viloyat IIB boshlig‘i polkovnik Saidkarim Nishonboyev “berilgan vazifalar bajarilmagani uchun” ishdan olingan. Qayd etish joiz, Sunnatov viloyat prokurori etib tayinlanguniga qadar O‘zbekiston bosh prokurori o‘rinbosari, Nishonboyev bo‘lsa ichki ishlar vaziri o‘rinbosari sifatida ishlagan edi.
Bo‘stonliq tumani hokimi va soliq inspeksiyasi rahbari sessiyaning o‘zida Prezident tomonidan ishdan olindi, deya xabar bermoqda “Xabar.uz”. Nashr manbasi bergan xabarga ko‘ra, ular “turizmni rivojlantirmagani, bu borada biror taklif bilan chiqmagani va oyog‘i yerdan uzilgani uchun” lavozimdan olingan. “Kun.uz”ning qayd etishicha, ishdan olingan hokim Baxtiyor Sultonov 2017-yil iyulida Ibrohim Hasanov o‘rniga Bo‘stonliq rahbariga aylangan edi.
Viloyatdagi to‘rtta tumanning soliq va moliya rahbarlari yoppasiga ishdan olingan. Bu haqda “Xabar.uz” xabar bermoqda, biroq gap aynan qaysi tumanlar haqida borayotganiga aniqlik kiritilmagan (nashr Prezidentning ushbu holat yuzasidan mas’ullarga qarata aytgan gapidan shunday iqtibos keltirgan: “Internetda e’lon qil, ularning o‘rniga odam top!”). Qayd etishlaricha, ular mahalliy byudjetga soliq tushumini bajarmagan.
Tayinlanganlar
Viloyat hokimi lavozimidan “vazifasini bajaruvchi” qo‘shimchasi olib tashlandi. Toshkent viloyatining avvalgi hokimi Shukrullo Boboyev 2017-yil oktabrida ishdan olingan edi (u va Jizzax viloyatining sobiq hokimi Ulug‘bek Uzoqov paxta hosiliga qo‘shib yozishga yo‘l qo‘yganlikda ayblangan edi). Boboyev o‘rniga 30-oktabr kuni O‘zbekiston bosh vaziri o‘rinbosari G‘ulomjon Ibragimov viloyat hokimi vazifasini bajaruvchi etib tayinlangan edi. 5-yanvardagi sessiyada Ibragimov viloyat hokimi lavozimiga to‘la tasdiqlangan. “Xabar.uz”ning xabar berishicha, Prezident amal kursisi aslida sinov ekanini eslatib, G‘ulomjon Ibragimovni “o‘zim ishongan kadr” deb atagan.
Toshkent viloyati ma’muriy markazi — Nurafshon shahriga hokim tayinlandi. Shu vaqtgacha viloyat hokimining kapital qurilish va kommunikatsiyalar masalalari bo‘yicha o‘rinbosari Usmon Rahimov Nurafshon shahri hokimi etib tayinlangan. Ma’lumot uchun, Nurafshon — sobiq To‘ytepa shahrining yangi nomi; bu aholi punktini yaqin yillar ichida O‘zbekistondagi ilk “aqlli” shaharga aylantirish rejalashtirilgan.
Viloyat hokimiga yangi o‘rinbosarlar tayinlandi. Xususan, Nurafshon shahriga hokim bo‘lib ketgan Usmon Rahimov o‘rnini Sanjar Yusupov egallagan. “Xabar.uz”ning yozishicha, sessiyada hokimning yana bir o‘rinbosari tayinlangani aytilgan, ammo uning ismi va lavozimi ma’lum qilinmagan. 6-yanvar holatiga ko‘ra, bu haqda biror rasmiy manba axborot bermagan edi.
Sessiyadan tashqari — 6-yanvar kuni O‘zbekiston Sog‘liqni saqlash vazirligi To‘raqul Arziqulov Toshkent viloyati Sog‘liqni saqlash boshqarmasi boshlig‘i etib tayinlangani haqida xabar berdi. Arziqulov bungacha Respublika shoshilinch tibbiy yordam ilmiy markazi Toshkent viloyat filiali direktori lavozimida ishlab kelgan.
Ogohlantirishlar
Prezidentdan beruxsat hokimlarni tergov qilish yo‘q! “O‘zbekiston rahbari kimda-kim Prezidentdan beruxsat viloyat, tuman hokimini tergovga chaqirsa, qamalishini aytgan. Turli tashkilotlarga yangi hokim (G‘ulomjon Ibragimov)ni g‘iybat va muhokama qilmaslikni buyurgan”, — deb yozadi “Xabar.uz” o‘z manbasiga asoslanib.Odamlar rozi bo‘lmaguncha kabinetda o‘tirish yo‘q! Sessiyada Shavkat Mirziyoyev tuman va shaharlar uchun mas’ul to‘rt sektor rahbari — hokim, prokuror, soliq idorasi rahbari va IIB boshlig‘i qanday ishlashi kerakligini aytgan. “Odamlar to rozi bo‘lmaguncha, to‘rtta sektor rahbari kabinetda o‘tirmaydi”, — degan Prezident.
Endi Toshkent shahridan turib ishlash yo‘q! Xabar berishlaricha, Shavkat Mirziyoyev viloyatning ko‘plab tashkilotlari hali ham Toshkent shahrida faoliyat yuritayotganini tanqid qilgan va mas’ullarga ularni tez fursatda Nurafshon shahriga ko‘chirish haqida topshiriq bergan. “Barcha tashkilotlar Nurafshonga tezroq ko‘chsin”, — deya Prezidentning so‘zlaridan iqtibos keltirmoqda “Xabar.uz”.
“Hokim atrofida uyushmasanglar, viloyat ikkiga bo‘linadi!”, — deb ogohlantirgan Prezident. Uning so‘zlariga ko‘ra, Toshkent viloyatidagi 7 ta shahar muammolari bilan bosh vazir Abdulla Aripov va Toshkent shahar hokimi Rahmonbek Usmonov shug‘ullanadi. “Agar shunda ham o‘zgarish bo‘lmasa, viloyatni ikkiga bo‘laman”, — degan Shavkat Mirziyoyev.
Izoh (0)