7-oktabr kuni Toshkentdagi Integro markazida ochilgan stol tennisi to‘garagi Davlat Turdialiyev xotira turniriga mezbonlik qildi.
O‘zbek sporti jurnalistikasining yetuk namoyondalaridan biri bo‘lgan sharhlovchini xotirlab, uning shogirdlari turnir tashkil qildi. Musobaqada “Sport-TV” va “Futbol-TV” sharhlovchilari ishtirok etdi: Zafar Imomxo‘jayev, Davron Fayziyev, Murod Rizayev, Hasan Turdialiyev, Diyor Imomxo‘jayev, Sanjar Mahamathanifov, Zafar Qosimov, Sardor Rahimov, Umid Ro‘ziyev, Farrux Rasulov. Shuningdek, Davlat Turdialiyev maktabidan yetishib chiqqan rejissyorlardan Jamoliddin Bobojonov, Rustam Mirdadayev kabilar ham turnirga tashrif buyurdi. Safarda ekani vajidan mashhur sharhlovchining shogirdlaridan Xayrulla Hamidov, Eldor Mustafoyev, Dilshod To‘xtabekov kabilar turnirda qatnasha olmadi.
Stol tennisi turniri “Sport-TV” sharhlovchisi Murod Rizayevning g‘alabasi bilan yakuniga yetdi. U musobaqa davomida barcha raqiblarini mag‘lub etishga muvaffaq bo‘ldi.
Turnirdan keyin sport sharhlovchilari uchun osh tortildi. Kelajakda Davlat Turdialiyev xotirasini yodga olib, “Sport-TV” va “Futbol-TV” sharhlovchilari o‘rtasida futbol o‘yini tashkil qilish fikri o‘rtaga tashlandi.
Davlat Turdialiyev O‘zbekiston sporti jurnalistikasining rivoj topishida katta hissa qo‘shgan sharhlovchi. U 2014-yilning 2-avgust kuni og‘ir hastalikdan so‘ng vafot etib, o‘zi tug‘ilgan Farg‘ona vodiysiga dafn etilgandi.
Ayni vaqtda Turdialiyev kasbini uning o‘g‘li Hasan Turdialiyev davom ettirmoqda. “Futbol-TV” sharhlovchisi sifatida faoliyat olib borayotgan Hasan Turdialiyev 2015-yilning aynan 2-avgust sanasida otasining ruhini shod etib, oila qurgandi. Ayni vaqtda uning qiz farzandi bor.
Izoh (0)