7 октябрь куни Тошкентдаги Integro марказида очилган стол тенниси тўгараги Давлат Турдиалиев хотира турнирига мезбонлик қилди.
Ўзбек спорти журналистикасининг етук намоёндаларидан бири бўлган шарҳловчини хотирлаб, унинг шогирдлари турнир ташкил қилди. Мусобақада «Спорт-ТВ» ва «Futbol-TV» шарҳловчилари иштирок этди: Зафар Имомхўжаев, Даврон Файзиев, Мурод Ризаев, Ҳасан Турдиалиев, Диёр Имомхўжаев, Санжар Маҳаматҳанифов, Зафар Қосимов, Сардор Раҳимов, Умид Рўзиев, Фаррух Расулов. Шунингдек, Давлат Турдиалиев мактабидан етишиб чиққан режиссёрлардан Жамолиддин Бобожонов, Рустам Мирдадаев кабилар ҳам турнирга ташриф буюрди. Сафарда экани важидан машҳур шарҳловчининг шогирдларидан Хайрулла Ҳамидов, Элдор Мустафоев, Дилшод Тўхтабеков кабилар турнирда қатнаша олмади.
Стол тенниси турнири «Спорт-ТВ» шарҳловчиси Мурод Ризаевнинг ғалабаси билан якунига етди. У мусобақа давомида барча рақибларини мағлуб этишга муваффақ бўлди.
Турнирдан кейин спорт шарҳловчилари учун ош тортилди. Келажакда Давлат Турдиалиев хотирасини ёдга олиб, «Спорт-ТВ» ва «Futbol-TV» шарҳловчилари ўртасида футбол ўйини ташкил қилиш фикри ўртага ташланди.
Давлат Турдиалиев Ўзбекистон спорти журналистикасининг ривож топишида катта ҳисса қўшган шарҳловчи. У 2014 йилнинг 2 август куни оғир ҳасталикдан сўнг вафот этиб, ўзи туғилган Фарғона водийсига дафн этилганди.
Айни вақтда Турдиалиев касбини унинг ўғли Ҳасан Турдиалиев давом эттирмоқда. «Futbol-TV» шарҳловчиси сифатида фаолият олиб бораётган Ҳасан Турдиалиев 2015 йилнинг айнан 2 август санасида отасининг руҳини шод этиб, оила қурганди. Айни вақтда унинг қиз фарзанди бор.
Изоҳ (0)