Futbol bo‘yicha O‘zbekiston milliy terma jamoasining JCh—2018 saralash bosqichidagi raqibi Suriya Yaponiyaga qarshi o‘rtoqlik o‘yinida durang qayd etdi.
Bellashuv 7-iyun kuni Yaponiyada bo‘lib o‘tdi. Uning 48-daqiqasida Mardik Mardikyan suriyaliklarni oldinga olib chiqqan bo‘lsa, oradan 10 daqiqa o‘tib Konno muvozanatni tiklashga muvaffaq bo‘ldi.
Mamlakatdagi beqaror vaziyatga qaramay, Suriya futbolchilari saralashda qit’aning yetakchi mamlakatlariga jiddiy qarshilik ko‘rsatmoqda. Bunga qadar ular Janubiy Koreya va Eron termalari bilan durang o‘ynagan, Samvel Babayan ustozlik qilayotgan O‘zbekiston termasi ustidan zafar quchishga muvaffaq bo‘lgandi.
Suriya 7-turdan keyin 8 ochko to‘plagan bo‘lib, uchlikda borayotgan O‘zbekistondan 4 ochko ortda qolmoqda. Oldinda suriyaliklar Xitoy va Qatar termalarini Malayziyada qabul qiladi, so‘nggi turni esa Eronda o‘tkazadi. Bu vaqtga kelib forslar katta ehtimol bilan JCh yo‘llanmasini qo‘lga kiritgan bo‘lishi mumkin.
Xalqaro o‘rtoqlik o‘yini Tokio, Yaponiya 7-iyun, chorshanba
Izoh (0)