Xitoyda avtobusdagi yong‘inda halok bo‘lgan 11 nafar bolaning o‘limi uchun haydovchi aybdor deb topildi

Tergovning dastlabki ma’lumotlariga ko‘ra, Janubiy Koreyadan besh nafar, xitoylik olti nafar bolaning o‘limiga olib kelgan avtobusdagi yong‘inni uning haydovchisi uyushtirgan bo‘lishi mumkin. Bu haqda 2-iyun, juma kuni “Sinxua” agentligi ma’lum qildi, deb yozadi “Interfaks”.

Agentlik yong‘in avtobus haydovchisi tomonidan uyushtirilgan bo‘lishi mumkinligi haqida qisqa xabar chop etdi, biroq boshqa tafsilotlarni keltirmagan.

Avvalroq may oyi boshida Xitoyning Shandun provinsiyasidagi tunnelda kutilmaganda avtobus yonib ketganligi haqida ma’lum qilingan edi. Bolalarni Veyxaye shahridagi xalqaro bolalar bog‘chasiga olib borayotgan avtobusdagi yong‘in oqibatida uch yoshdan olti yoshgacha bo‘lgan 11 nafar bola, shuningdek, avtobus haydovchisi halok bo‘lgan.

Avtobusda jami 23 kishi bo‘lgan.