Alisher Usmonov Navalniyning o‘ziga tegishli nashrlarda senzura joriy etgani haqidagi da’vosini rad etdi

Alisher Usmonov o‘zining mediaaktivlarida hech qanday senzurani joriy etmagan. Milliarderni “Kommersant” nashriyot uyida senzura qo‘llaganlikda ayblagan muxolifatchi Aleksey Navalniyga Usmonovning matbuot xizmati shunday javob qaytardi, deya ma’lum qildi “RBK”.

Xabarda “Vlast” jurnali sobiq bosh muharriri Maksim Kovalskiy 2011-yilda nashriyot uyini tomonlarning kelishuviga asosan tark etgani bildirilgan.

“Janob Navalniy tomonidan Usmonov senzurani joriy etgani yuzasidan hech qanday dalillar taqdim etilmadi. Qolaversa, etik tortishuvga sabab bo‘lgan material na chiqquncha, na chiqqandan so‘ng senzura qilinmagan va hozirgacha ‘Kommersant’ nashriyot uyi saytida turibdi”, — deyiladi matbuot xizmati xabarida.

Maksim Kovalskiy nashr Putin sha’niga nisbatan haqorat bitilgan saylov byulleteni fotosini chop etganidan so‘ng “Vlast” jurnali bosh muharriri lavozimini tark etgandi. Nashrning bosh aksiyadori bo‘lgan Usmonov bunday foto chiqishini “bezorilik” deb atagandi.

Kovalskiy 2011-yil 13-dekabr kuni ishdan bo‘shatildi. Oradan 3 kun o‘tib, mazkur qaror bekor qilindi va tomonlar Kovalskiy lavozimidan o‘zaro kelishuviga muvofiq ketgani haqida qaror qabul qildi.