JCh—2018 saralash bosqichidagi O‘zbekistonning navbatdagi raqibi Eron mashg‘ulotlarga kirishdi. Bu haqda O‘FF matbuot xizmati xabar berdi.
12-iyun kuni Tehronda O‘zbekistonga qarshi saf tortadigan fors futbolchilarini Rossiya mundialidan yana bitta qadam ajratib turibdi. Ramazon oyida bo‘lib o‘tadigan uchrashuv eronlik futbolchilar g‘alabasi bilan yakuniga yetsa, Karlush Keyrush jamoasi ketma-ket ikkinchi bor mundial chiptasiga ega chiqadi.
6-iyun kuni Chernogoriya termasi bilan o‘rtoqlik o‘yinida maydonga tushadigan Eron termasi ayni vaqtda Astriyada yig‘inga kirishgan. Mashg‘ulotlar oldidan bosh murabbiy Karlush Keyrush Facebook sahifasi orqali O‘zbekiston bilan o‘yin oldidan o‘z fikrlarini bayon qildi.
Avstriyadagi o‘quv-mashg‘ulot yig‘inida ekanmiz, demak, o‘z-o‘zimizga savol berish vaqti keldi: O‘zbekistonga qarshi o‘yin oldidan futbolchilardagi fidoyilikdan qoniqish hosil qilganmizmi?O‘zbekistonga qarshi bellashuvda qo‘lga kiritiladigan 3 ochko JCh yo‘llanmasi yo‘lidagi “match-point” bo‘ladi. Yanada aniqroq aytadigan bo‘lsam, O‘zbekistonga qarshi o‘yin biz uchun xuddi JCh finalidek gap. Har doim aytganim kabi, biz o‘zimizning mundialda o‘ynayapmiz!
O‘zbekiston bilan o‘yin eng qiyini va muhimi bo‘libgina qolmay, jamoa sifatida kuch-qudratimizni ko‘rsatishga katta imkoniyat beradi. Bo‘lajak o‘yindan qoniqish hosil qilibgina qolmay, har bir daqiqa va har bir soniyada o‘z burchimizni, to‘liq e’tiborimizni, maksimum professionallikni ko‘rsatishimiz kerak. Bundan kami bizni qoniqtirmaydi. Chunki muvaffaqiyat osonlik bilan kelmaydi. Jamoaning har bir futbolchisi va har bir xodimi — saralash bosqichi uchun mas’ul bo‘lgan har bir inson borini berishi va fidoyilik ko‘rsatishi shart!
Karlush Keyrush, Eron termasi bosh murabbiyi
O‘zbekiston terma jamoasi Eronga qarshi birinchi uchrashuvda raqib darvozasiga bitta ham aniq zarba bera olmagandi. Forslar javob o‘yiniga tayyorgarlik doirasida O‘zbekistondan kuchliroq bo‘lgan raqibni sparing sifatida tanlab oldi. O‘zbekiston esa JCh saralashining hal qiluvchi bosqichida 1 ta ham g‘alabaga erishmagan va Erondan kuchli bo‘lmagan Tailandga qarshi o‘rtoqlik o‘yinida 6-iyun kuni maydonga tushadi.
Mazkur bellashuvga bir hafta vaqt qolganida ham O‘zbekiston milliy terma jamoasining tarkibi ommaga ma’lum qilinmagan. Samvel Babayan esa forslarga qarshi o‘yin borasida o‘z fikrini bildirmagan. Karlush Keyrushning kengaytirilgan tarkibi esa O‘zbekiston nashrlarida taxminan 1 oy oldin ko‘rinish bergandi.
Izoh (0)