Windows operatsiya tizimiga ega kompyuterlarga WannaCry virusidan foydalanib uyushtirilgan ommaviy kiberhujum keltirgan zarar miqdori 1 milliard dollardan oshdi. Bu haqda “TASS” xabar bermoqda.
McClatchy axborot xizmatiga ko‘ra, 12-may kuni boshlangan kiberhujumlar natijasida bir haftaga yetmagan vaqt davomida kamida 150 mamlakatda 300 minggacha kompyuter zararlandi. Amerikalik mutaxassislar kelgusida xakerlar tomonidan bunday harakatlar qaytarilishi mumkinligini istisno etmadi.
“WannaCry tomonidan atigi ilk 4 kun davomida yetkazilgan ziyon 1 milliard dollardan oshdi. Bunga butun dunyo bo‘ylab yirik tashkilotlarda faoliyat to‘xtagani, manbalar yo‘qolgani, ishlab chiqarish sur’ati pasaygani va maromi buzilgani, sud ekspertizalari, nufuzga yetkazilgan zarar va boshqa omillar kiradi”, — deydi KnowBe4 kompaniyasi rahbari Styu Syuverman.