Apple’ning shu yil chiqadigan 9 ta yangi qurilmasi (fotogalereya)

Apple juda yopiq kompaniya, u chiqarilishi rejalashtirilayotgan mahsulotlari haqida deyarli hech qachon ma’lum qilmaydi. Ammo ma’lumotlar tarqalib ketishi oldini ham ololmaydi, deb yozadi Insider Pro. Quyida 2017-yil oxirigacha chiqishi kutilayotgan 9 ta gadjetni keltirib o‘tamiz.

Siri “aqlli” kolonkasi

Mish-mishlarga ko‘ra, kompaniya Siri ovozli yordamchisi bo‘lgan smart-dinamikni ishlab chiqmoqda. Ba’zi ma’lumotlarga qaraganda, Apple kolonkasiga ekran o‘rnatiladi, shuningdek, yuzni tanib olish funksiyasiga ega bo‘ladi. U iyundayoq Worldwide Developers Conference’da taqdim etilishi mumkin.

iPhone 8

Ilk iPhone chiqarilganiga o‘n yil to‘ldi, shu tufayli smartfonning yubiley versiyasidan muxlislar alohida narsalarni kutmoqda.

U romsiz ekran, yaxshilangan kamera va shisha orqa panelli bo‘lishi kutilmoqda. Apple ishlab chiqarishda qiyinchiliklarga duch kelishi mumkin, shu sababli iPhone 8 an’anaviy tarzda sentabrda emas, bir necha oy kechroq chiqishi mumkin.

iPhone 7s va 7s Plus

iPhone 7’ning yangilangan versiyalari iPhone 8 bilan bir qatorda kuzda chiqishi kutilmoqda, ular iPhone 8’dan ancha arzonroq bo‘ladi.

Yaxshilangan MacBook Pro

Yanada kuchli xususiyatlarga ega yaxshilangan versiya iyunda WWDC’da taqdim etilishi kutilmoqda

Quvvati oshirilgan MacBook

Apple WWDC’da yangi MacBook chiqarilishi haqida e’lon qiladi — unda asosiy e’tibor unumdorlikka emas, avtonom ish vaqtiga qaratiladi.

Yangilangan MacBook Air

Hatto MacBook Air ham yangilanishi mumkin.

Yangi iMac

Aprelda Apple professional foydalanuvchilarga mo‘ljallangan yangi iMac 2017-yilda chiqishini e’lon qilgan edi.

Uchinchi avlod Apple Watch

Kuzda kompaniya uchinchi avlod Apple Watch’ni namoyish etadi va shu tariqa yangilanmalarning yillik siklini ishga tushiradi.

4K’ni qo‘llab-quvvatlovchi Apple TV pristavkasi

Mish-mishlarga qaraganda, Apple Ultra HD formatdagi videolarni ko‘rish imkonini beruvchi Apple TV prostavkasi ustida ishlamoqda. U shu yil chiqarilishi mumkin.