Menni Pakyaoga promouterlik qilgan Bob Arum o‘zbekistonlik Fazliddin G‘oibnazarov bilan shartnoma tuzishga yaqin turibdi

AQSHning Las-Vegas shahrida bo‘lib turgan o‘zbekistonlik bokschi Fazliddin G‘oibnazarov yaqin kunlar ichida katta shartnomalaridan biriga imzo chekadi. Bu haqda “Olamsport” nashri xabar berdi.

Avvalroq Rio—2016 Olimpiadasi chempioni faoliyatini professional boksda davom ettirish niyatida ekani xabar qilingandi. Boisi unga Amerikaning bir qator promouterlik kompaniyalaridan takliflar kelib tushgan. Ularni o‘rganish maqsadida G‘oibnazarov ustozi Abror Tursunpo‘latov bilan okean ortiga jo‘nab ketgandi.

Dunyo boks markazi hisoblangan Las-Vegasda Fazliddin G‘oibnazarov mashhur Bob Arum bilan tanishgan. Bu esa har ikki tomonning shartnoma imzolashi bilan yakunlanishi mumkin. Arumga tegishli promouterlik kompaniyasi o‘z safida o‘zbekistonlik charm qo‘lqop ustasini ko‘rish niyatida.

Ma’lumot uchun, Bob Arum ko‘plab jahon chempionlari qatorida filippinlik mashhur Menni Pakyaoga ham homiylik qilgan.