O‘zbekistonda Samsung kompaniyasining ommabop Galaxy A smartfonlar seriyasining uchinchi avlodi sotuvga chiqdi, deb yozadi “Mobinfo.uz”. Hozircha o‘zbekistonliklar seriyadagi ikkita modelni — Galaxy A3 (2017) va Galaxy A5 (2017)ni xarid qilishi mumkin.
Yangi qurilmalarning korpusi 3D-shisha va metall qorishmasidan yasalgan. Galaxy A (2017) lineykasi qora, tillarang va havorang tuslarda chiqarilgan.
2016-yilgi seriyadan farqli ravishda, Galaxy A seriyasi tarixda birinchi marta IP68 standarti bo‘yicha suv va changdan himoyaga ega bo‘ldi. Bundan tashqari, yangi smartfonlarda 256 gigabaytgacha kengaytirish mumkin bo‘lgan microSD xotira mavjud.
Galaxy A3 (2017) 4,7 dyuymli HD AMOLED ekran, 13 megapikselli asosiy va 8 megapikselli old kamera, 2 Gb tezkor va 16 Gb doimiy xotira, 2350 mA/soat sig‘imli akkumulyatorga ega bo‘ldi.
A5 (2017) modeli esa 5,2 dyuymli Full HD AMOLED displey, 16 megapikselli asosiy va old kamera, 3 Gb tezkor va 32 doimiy xotira, 3000 mA/soat sig‘imli batareya bilan jihozlandi. A3 (2017)dan farqli o‘laroq, unda tezkor quvvat olish funksiyasi mavjud.
Toshkentdagi “Fleshka” savdo majmuasida Galaxy A3 (2017)ni 2,1—2,8 million so‘m, Galaxy A5 (2017)ni esa 2,6—3,5 million so‘m atrofida xarid qilish mumkin.
Ushbu qurilmalarni ko‘rsatilgan narxda sotib olishga “Daryo” nashri kafolat bermaydi. Qurilmalar va ularning narxi haqidagi axborot faqat tanishish uchun taqdim etilgan.
Izoh (0)