Server Jeparov
O‘zbekistonlik futbol agenti San’at Sharipov yaqin soatlar ichida Server Jeparovga Eron klubi taklif bilan chiqishi mumkinligi haqida aytgandi. Va nihoyat fors nashrlari ham bu haqda jar soldi.Tasnim News Agency Tehronning “Istiqlol” klubi Server Jeparovni yarim mavsum o‘ynatish uchun 800 000 AQSh dollari to‘lashga tayyorligini bildirgan.
Xabarda 34 yoshli o‘zbekistonlik futbolchi mamlakat terma jamoasi sharafini 121-uchrashuvda himoya qilib, 25 ta gol urgani, o‘z vaqtida Janubiy Koreyaning “Seul” va “Seongnam”, Saudiyaning “Ash-Shabab”, Toshkentning uch grandi — “Paxtakor”, “Bunyodkor” va “Lokomotiv” klublari safida to‘p surgani qayd etilgan. Shuningdek, faoliyatini Namanganning “Navbahor” klubida boshlab, 46 ta o‘yinda 7 ta gol urgani ham e’tibordan chetda qolib ketmagan.
Ma’lumot uchun, Eron chempionatida jamoalar birinchi davrani yakunlagan. “Istiqlol” klubi 22 ochko bilan turnir jadvalida 7-o‘rinni egallab turibdi. Peshqadam “Persipolis” hisobida 32 ochko bor. Tehronliklar vaziyatni o‘nglash uchun Jeparovning xizmatidan foydalanish niyatida.
Farhod Tojiyev
Tojiyevlar oilasining kichik vakili Farhod Malayziyaning “T-Tim” klubida safida gol urishda davom etdi. Biroq uning jamoa bilan shartnoma tuzish masalasi haligacha to‘liq hal etilmadi.
“Championat.asia” ma’lumotiga ko‘ra, Tojiyev “Terengganu Siti” klubiga qarshi o‘yinda jamoasining birinchi golini urgan. Keyinroq esa jamoadoshlari yana 4 ta gol kiritgan — 5:0.
Avvalroq Tojiyev bir emas, ikki bor dubl qayd etishga muvaffaq bo‘lgandi. Uning bu xizmatlari yuqori baholansa, Tojiyevning oylik-maoshi ham shunday yuqori bo‘lishi kerak. Shundagina hujumchi o‘zbekistonlik boshqa bir futbolchi Dilshod Sharofutdinovga jamoadosh bo‘ladi. Sir emaski, Farhod Tojiyev “T-Tim” safida oldin ham to‘p surgan.
Qiziq tomoni, Tojiyevlarning o‘rtanchasi Kamoliddin ham Malayziyada. U “Felda Yunayted” safida ko‘rikdan o‘tayotgani kecha xabar qilingandi.
Vitaliy Denisov
O‘zbekiston milliy terma jamoasi himoyachisi Vitaliy Denisov Ispaniyada bo‘lib turibdi. O‘z klubi “Lokomotiv” bilan, albatta. Rossiyalik “temiryo‘lchilar” qishki ta’tilni Yevropaning o‘zida o‘tkazishga qaror qilgan.
Junior Axissan Lendri
Mamlakatning amaldagi chempioni ikki nafar Kot-d’Ivuarlik futbolchini o‘z safiga qo‘shib olgandi. Endi esa ko‘rik uchun uchinchi ivuarlik futbolchi tashrif buyurgani aytildi.
Junior Axissan Lendri 20 yoshda. U Kot-d’Ivuar yoshlar terma jamoasi safida Afrika chempioni bo‘lgan. 2013-yilgi jahon chempionatida esa chorak finalga qadar yetib borgan.
Junior Axissan o‘tgan mavsumni Kiyevning “Dinamo”sida o‘tkazgan. “Lokomotiv”da iliq taassurot qoldirsa va kelisha olsa, faoliyatini Toshkentda davom ettiradi.
“Bunyodkor”
Amirliklarda bo‘lib turgan “qaldirg‘ochlar” bunga qadar ikkita o‘yin o‘tkazib, avvaliga mahalliy “Ash-Shaab”ni mag‘lub etgan, ketidan esa Ganaga imkoniyatni boy bergandi. Uchinchi o‘rtoqlik o‘yinida Sergey Lushchan bilan mamlakat chempioni bo‘la olmayotgan klub va nihoyat durang ham o‘ynadi.
“Bunyodkor” — “Xenan Jianye” (Xitoy) 1:1
Gollar: Shahzodbek Nurmatov. Xitoy klubidan kim va nechanchi daqiqada gol urgani qiziq bo‘lmagan va uning nomi keltirilmagan.13-yanvar, juma“Bunyodkor” — “Al-Faysaliy” (Saudiya Arabistoni)
15-yanvar, yakshanba“Bunyodkor” — “Aberdin” (Shotlandiya)
20-yanvar, juma“Bunyodkor” — Iordaniya
“Nasaf”
Qarshining “Nasaf” klubi Yevropa jamoalari bilan o‘rtoqlik o‘yinida maydonga tushishi, biroq keyinroq Antaliyadagi shamol birinchi uchrashuvga halal bergani ma’lum qilingandi. 11-yanvar kuni Ro‘ziqul Berdiyev jamoasi 2 ta uchrashuv o‘tkazdi.
Birinchisida Kipr, ikkinchisida esa Ozarbayjon klubi mag‘lub etildi. Fozil Musayev, Azamat Allaniyazov, Shuhrat Muhammadiyev, Artur Gevorkyan, Erkin Boydullayev kabi futbolchilar jamoani tark etgan bo‘lsa-da, “Nasaf” barqarorligini saqlab turibdi.
“Nasaf” — “AEK” (Kipr) 1:0
Gol: Shahboz Erkinov, 55 (1:0).“Nasaf” — “Neftchi” (Ozarbayjon) 1:0
Gol: Farruh Sayfiyev, 67 (1:0).15-yanvar, yakshanba“Nasaf” — “Botoshani” (Ruminiya)
16-yanvar, dushanba“Nasaf” — “Sumgait” (Ozarbayjon)
18-yanvar, chorshanba“Nasaf” — “Karpati” (Ukraina)
20-yanvar, juma“Nasaf” — “Shaxtyor” (Qozog‘iston)
Izoh (0)