Yuritsa Bulyat
“Bunyodkor” talablariga to‘g‘ri kelmagan xorvatiyalik futbolchi “Paxtakor” safiga o‘tdi. Himoyachi yangi klubi bilan 2017-yil oxiriga qadar shartnoma imzoladi.
31 yoshli himoyachi faoliyati davomida Xorvatiyaning “Zadar”, “Xayduk”, Isroilning “Makkabi”, Germaniyaning “Energi”, Ukrainaning “Metallist” klublarida to‘p surgan. 2016-yil “Bunyodkor” tarkibida 25 ta uchrashuv o‘tkazgan.
Avvalroq “Bunyodkor” rahbarlaridan biri Baxtiyor Boboyev legioner futbolchilardan ko‘ngli to‘lmagani haqida aytib, ularning barchasiga javob berilganini ta’kidlagandi.
Kamoliddin Tojiyev
Tojiyevlar oilasining o‘rtancha vakili Kamoliddin Tojiyev Malayziyaning “Felda Yunayted” futbol klubi safida mashg‘ulot o‘tkazmoqda. Bu haqda “Futbol Ekspress” nashri ma’lumot bergan. Shartnoma tuzilgani borasida esa xabar yo‘q.
Avvalroq “Felda Yunayted” sharafini himoya qilib, Malayziya vitse-chempioni bo‘lgan Lutfulla To‘rayev O‘zbekistonga qaytib kelgandi. Ko‘rinishidan, o‘zbekistonlik futbolchilar “Felda Yunayted”da iliq taassurot qoldirgan.
Ayni vaqtda Dilshod Sharofutdinov Malayziyaning “T-Tim” klubi safida to‘p suradi. O‘tgan hafta himoyachi Bobur Akbarov mamlakatning “Kuala Lumpur” klubi bilan shartnoma tuzgandi. “T-Tim”, shuningdek, Tojiyevlarning kichigi Farhod va Shavkat Salomov bilan ham muzokara olib bormoqda.
“Paxtakor”dagi o‘yinlari orqali tanilgan Kamoliddin Tojiyev bunga qadar ham xorijda to‘p surgan. U 2011—2013-yillar davomida Xitoyning “Jiangsu Seynti” klubida faoliyat olib borgan.
“Nasaf”
Qarshi klubi kecha — 10-yanvar kuni Kiprning “Limassol” klubiga qarshi o‘rtoqlik o‘yinida maydonga tushishi kerak edi. Biroq nafaqat to‘pni, balki futbolchilarning o‘zini ham uchirib yuborishi mumkin bo‘lgan shamol esib, “Nasaf”ni Kipr jamoalariga qarshi o‘yindan saqlab qoldi.
Antaliyada bo‘lib turgan “Nasaf” 11-yanvar kuni Ozarbayjonning “Neftchi” klubi bilan o‘ynashi mumkin. Farg‘onaning “Neftchi”sidan farq qiladigan jamoaga qarshi o‘yinga qadar shamol tinishidan murabbiylar shtabi umidvor.
“Bunyodkor”
Gana terma jamoasiga qarshi o‘yinda imkoniyatni boy berganiga qaramay, “qaldirg‘ochlar”ning kayfiyati chog‘. O‘zbekiston milliy terma jamoasi yaqinidan ham o‘tmagan ganaliklar bilan, “Bunyodkor” o‘rtoqlik o‘yini o‘tkazdi.
Uchrashuvdan keyin Sergey Lushchan “yuqsin-yuqsin” operatsiyasida ishtirok etib, mashhur mutaxassis Avraam Grantning qo‘lini siqib qo‘ydi.
Izoh (0)