AQSh hukumati Pan Gi Munning akasi va jiyanini poraxo‘rlikda aybladi

AQSh hukumati BMT sobiq bosh kotibi Pan Gi Munning akasi va jiyanini poraxo‘rlikda aybladi, deb yozadi “TASS”. Ayblovlar Manxetten tumanidagi Nyu-York sudida ilgari surildi.

Reuters ma’lumotlariga ko‘ra, Chu Xyon Pan va Pan Gi San Yaqin Sharq mamlakatlaridan biridagi ismi oshkor etilmayotgan mansabdorga pora berish maqsadida til biriktirishda ishtirok etganlikda ayblanmoqda. Ta’kidlanishicha, bunda gap Vyetnamda 800 million dollarlik binolar majmuasini sotish bo‘yicha oldi-sotdini o‘z ichiga oluvchi sxema haqida bormoqda.

Sobiq bosh kotibning jiyani Chu Xyon Pan Nyu-Yorkda ko‘chmas mulk savdosi bo‘yicha agent bo‘lib ishlaydi. Chu Xyon Panning otasi — Pan Gi San Janubiy Koreyaning Keangnam Enterprises qurilish kompaniyasida bosh maslahatchi lavozimida ishlagan.

Tergov hujjatlariga ko‘ra, ushbu qurilish kompaniyasi Chu Xyon Pandan Vyetnamdagi loyiha uchun investor topishni so‘ragan. Mablag‘larni qonuniy yo‘l bilan topish o‘rniga, nyu-yorklik rieltor va uning otasi sxema tashkil qilib, yaqin sharqlik mansabdorni uning mamlakatidagi suveren investitsiya fondi Vyetnamdagi majmuani sotib olishiga ko‘ndirmoqchi bo‘lgan.

Ammo oldi-sotdi amalga oshmay qoldi, Keangnam Enterprises esa sudga bankrotlik haqida ariza berdi.