Angliyaning “Manchester Yunayted” futbol klubi mamlakat liga kubogi sari birinchi qadamni tashladi. Yarim finalning dastlabki o‘yinida “Xall Siti”ni qabul qilgan “qizil iblislar” 2:0 hisobida zafar quchdi.
Uchrashuvning 56-daqiqasiga kelib Xuan Mata mezbonlarni oldinga olib chiqqan bo‘lsa, asosiy vaqt yakuniga 3 daqiqa qolganida Maruan Falleyni “yo‘lbarslar” darvozasiga ikkinchi golni urdi. Bu “Xall Siti” maydonida bo‘lib o‘tadigan javob o‘yini oldidan “Yunayted”ning imkoniyatlarini bir muncha oshirib berdi.
Ma’lumot uchun, “Yunayted” bunga qadar “Northempton” (3:1), “Manchester Siti” (1:0) va “Vest Hem” (4:1) klublarini musobaqadan chiqarib yuborgan bo‘lsa, “Xall Siti” klubi “Stok Siti” (2:1), “Bristol Siti” (2:1), “Nyukasl” (1:1 pen: 3:1) kabi raqiblar dovonidan o‘tib kelgandi.
APL turnir jadvalida so‘nggi — 20-o‘rinni egallab turgan “Xall Siti” chempionat doirasidagi o‘yinda “Manchester Yunayted”ga o‘z maydonida 0:1 hisobida imkoniyatni boy bergandi.
Bugun — 11-yanvardan 12-yanvarga o‘tar kechasi yarim finalning ikkinchi uchrashuvi bo‘lib o‘tadi — “Sautgempton” — “Liverpul.
Angliya liga kubogi Yarim final. Birinchi uchrashuv 10-yanvar, seshanba
Izoh (0)