Lola Karimova-Tillayeva ijtimoiy tarmoqlardagi sahifalari orqali O‘zbekistonning Birinchi Prezidenti Islom Karimov xotirasini abadiylashtirish maqsadida asos solingan fondning birinchi loyihasi haqida ma’lum qildi. Bu haqda “Darakchi.uz” xabar bermoqda.
“Buxoro viloyati, Qorako‘l tumanida joylashgan ikki umumta’lim maktabi qayta ta’mirlash ishlaridan so‘ng o‘quvchilar uchun o‘z eshiklarini ochdi. Mazkur maktablardagi kapital rekonstruksiya ishlari ‘Sen Yolg‘iz Emassan’ Fondi tomonidan amalga oshirilgan edi, ammo otamning xotiralarini yodga olib va xolis niyatlarimiz ramzi sifatida ushbu xayrli ishni biz Islom Karimov Fondining birinchi loyihasi sifatida taqdim etmoqchimiz.
Besh gektarga teng umumiy maydonda joylashgan 5 va 43-sonli maktablarni ta’mirlash ishlari Fond tomonidan mazkur yilning may oyida boshlab yuborilgan edi. 1961 va 1980-yillarda qurilgan ikkala maktabning binolari juda eskirgan bo‘lib, ancha yomon ahvolda edi. Qayta ta’mirlash ishlari binolarning devorlari va fundamentini mustahkamlashdan boshlab yuborildi. Qo‘shimcha qilib majlislar va sport zallari, maktab hovlilarida futbol, voleybol, basketbol, gandbol va tennis maydonchalari barpo etildi.
341 bola tahsil olayotgan 43-maktab uchun qo‘shimcha 5 ta o‘quv sinflari qurib bitkazildi. Endi o‘quvchilar qo‘shni maktab sinflarida emas, balki o‘z maktablarida bemalol dars o‘tishlari mumkin. 711 o‘quvchiga ega 5-maktab uchun yangi gimnastika zali va oshxona barpo etildi.
Barcha korpuslarning devor va poydevorlari mustahkamlanib, xonalarni isitish va kanalizatsiya tizimlari yangilanib, suv quvurlari va yong‘in xavfsizligi tizimi o‘tkazildi.
Maktabdagi o‘quv va ma’muriy xonalar zamonaviy mebellar bilan jihozlanib, kompyuter texnikalari bilan ta’minlandi. Kimyo, fizika, biologiya, informatika, mehnat xonalari ham zarur anjomlar bilan jihozlandi”, — deb yozadi Lola Karimova-Tillayeva.
Eslatib o‘tamiz, noyabr oyida Lola Karimova-Tillayeva va Tatyana Karimova Islom Karimov nomidagi jamoatchilik xayriya fondiga asos soldi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)