Qonunchilik palatasi deputatlari xalqaro kuzatuvchilar bilan uchrashdi

2-dekabr kuni Prezident sayloviga tayyorgarlik ko‘rish va uni o‘tkazish jarayonini kuzatish uchun O‘zbekistonga kelgan xorijiy davlatlar va xalqaro tashkilotlar vakillari joylarda tashkil etilayotgan uchrashuvlar doirasida Oliy Majlis Qonunchilik palatasiga tashrif buyurdi. Bu haqda Oliy Majlis Qonunchilik palatasi matbuot xizmati xabar berdi.

Shu kuni Quyi palataning Mudofaa va xavfsizlik masalalari qo‘mitasi raisi R. Kamilov, Mehnat va ijtimoiy masalalar qo‘mitasi raisi Yo. Umarov hamda Xalqaro ishlar va parlamentlararo aloqalar qo‘mitasi a’zosi A. Umirzoqovlar Germaniya Bundestagi xalqaro hamkorlik bo‘yicha yetakchi eksperti A. Yan bilan muzokara olib bordi.

Rossiya Federatsiyalar Kengashi raisi o‘rinbosari I. Umaxanov bilan bo‘lib o‘tgan muloqotlar davomida Oliy Majlis Qonunchilik palatasi Spikeri N. Ismoilov hamda Xalqaro ishlar va parlamentlararo aloqalar qo‘mitasi raisi A. Jalilov mehmonga O‘zbekistonda amalga oshirilayotgan demokratik islohotlar haqida so‘zlab berdi.

Shuningdek, Demokratik institutlar, nodavlat tashkilotlar va fuqarolarning o‘zini-o‘zi boshqarish organlari qo‘mitasi raisi A. Saidov, Xalqaro ishlar va parlamentlararo aloqalar qo‘mitasi raisi o‘rinbosari Z. Umarov, Ekologiya va atrof-muhitni muhofaza qilish masalalari qo‘mitasi a’zosi S. Samoylov, Mehnat va ijtimoiy masalalar qo‘mitasi a’zosi M. Dadaxodjayevalar Belgiya faxriy senatori D. Tilmans va Belgiya parlamenti vakillar palatasi a’zosi V. Yuksel bilan uchrashdi.

Muloqot davomida mamlakatda amalga oshirilayotgan demokratik islohotlarning borishi, qonunchilik tizimidagi yangiliklar, xususan, konstitutsiyaga mamlakat Prezidenti, parlamenti, hukumati va sud hokimiyati o‘rtasida vakolatlar taqsimoti bilan bog‘liq tuzatish va o‘zgartirishlar kiritilgani, natijada davlat hokimiyati organlari tizimida Oliy Majlisning roli va ahamiyati sezilarli darajada kuchaygani hamda imkoniyatlari kengaygani haqida so‘z bordi.

Uchrashuvlarda mehmonlarga O‘zbekistonning ikki palatali parlamenti faoliyati to‘g‘risida so‘zlab berildi. Shuningdek, mamlakatlar oliy qonun chiqaruvchi organlari o‘rtasidagi parlamentlararo hamkorlikka doir masalalar yuzasidan atroflicha fikr almashildi.