Qorli ob-havo Toshkentdan Qashqadaryoga qatnovchi taksilarda yo‘l haqi 120 ming so‘mgacha ko‘tarilishiga sabab bo‘ldi

O‘zbekistonda ob-havoning keskin sovishi va qalin qor yog‘ishi oqibatida mamlakat bo‘ylab avtotransport qatnovi og‘irlashdi.

Xususan, “Darakchi.uz”ning Facebook’dagi avtohavaskorlarning guruhlariga asoslanib yozishicha, “Toshkent — Qashqadaryo” yo‘nalishida qatnovchi yengil avtomobillarda yo‘l haqi bir kishi uchun 120 ming so‘mgacha ko‘tarilib ketgan.

Foydalanuvchilar nafaqat viloyatlarga qatnaydigan yengil avtomobillar, balki Toshkent shahri ichida harakatlanayotgan taksilar ham yo‘l haqini oshirganini ma’lum qilgan.

“Kimdir bu holatni qoralasa, yana kimdir haydovchilarga yon bosmoqda”, — deb yozadi “Darakchi.uz”.

“Taksi kimmat emish. Men ertalab shaxsiy ishim bilan chiqib keldim, faqat 2—3-tezlikda yursa bo‘ladi. Shunda qancha benzin sarf qilinadi, qani, biladiganlar aytsin! Bunday havoda yo‘l haqi uch baravar qimmat bo‘lishi tabiiy hol”, — deb yozadi foydalanuvchilardan biri.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.