Qozog‘istonlik og‘ir atletikachi Ilya Ilyin Pekin–2008 va London–2012 oltin medallaridan mahrum etildi

Xalqaro olimpiya qo‘mitasi (XOQ) taqiqlangan preparatlar qabul qilgani uchun qozog‘istonlik Ilya Ilyinni Pekin–2008 va London–2012 Olimpiya o‘yinlarida qo‘lga kiritgan oltin medallaridan mahrum qildi. Bu haqda Qozog‘iston Milliy olimpiya qo‘mitasiga tayanib, “TASS” xabar bermoqda.

XOQ Intizom qo‘mitasi sportchining “A” va “B” namunalarini o‘rganib chiqdi va uning natijalarini bekor qilishga qaror qildi. Ilyin qancha muddatga diskvalifikatsiya qilinishi Xalqaro og‘ir atletika federatsiyasi (IWF) tomonidan hal qilinadi.

Qayd etish joiz, qozog‘istonlik sportchi doping mojarosi tufayli Rio–2016 Olimpiya o‘yinlarini o‘tkazib yuborgan edi.

Ilgariroq XOQ Pekin–2008 Olimpiadasida sovrindor bo‘lgan 4 nafar qozog‘istonlik sportchining natijasini bekor qilgani haqida xabar qilingandi.