Kiberfutbol bo‘yicha jahon chempionati: O‘zbekiston vakili o‘z ishtirokini angliyalik kiberfutbolchiga qarshi o‘yin bilan boshlaydi
Parijda 29—31-oktabr kunlari kiberfutbol bo‘yicha jahonning 32 kiberfutbolchisi o‘rtasida bo‘lib o‘tadigan 2016-yilgi jahon chempionatida O‘zbekiston vakili ham ishtirok etadi. “Bunyodkor” FK matbuot xizmati xabariga ko‘ra, musobaqada O‘zbekiston sharafini “Bunyodkor” kiberfutbolchisi Muhammadamin Turg‘unboyev (Ali_Bebeto) himoya qiladi.
Muhammadamin Turg‘unboyev sentabr—oktabr oylarida Toshkentda bo‘lib o‘tgan jahon chempionati saralash bahslarida muvaffaqiyatli ishtirok etib, O‘zbekiston uchun ajratilgan yagona yo‘llanmani qo‘lga kiritgan edi.
Muhammadamin ayni vaqtda Parijda bo‘lib turibdi va jahon chempionati oldidan tayyorgarlikning so‘nggi bosqichini olib bormoqda. Fransiyada unga O‘zbekiston Kiberfutbol assotsiatsiyasi rahbari Azizbek Pattaxov xamrohlik qilmoqda.
Kiberfutbol bo‘yicha jahon chempionatida 32 sportchi to‘rt guruhga sakkiz kishidan taqsimlangan holda ishtirok etadi. “Pley-off” bosqichiga har bir guruhdan to‘rttadan (jami — 16 ta) ishtirokchi yo‘llanma oladi.
Keyingi bosqichda kuchlilar olimpiya tizimida saralab boriladi. Muhammadamin Turg‘unboyev (Ali_Bebeto) jahon chempionatidagi ishtirokini 29-oktabr kuni angliyalik Spencer “Gorilla” nikli kiberfutbolchiga qarshi bahs bilan boshlaydi.
Kiberfutbol bo‘yicha jahon chempionatining umumiy sovrin jamg‘armasi 15 ming AQSh dollari bo‘lib, 1-o‘rin sohibi 8 ming, 2-o‘rin – 4 ming, 3-o‘rin – 2 ming, 4-o‘rin egasi esa 1 ming dollarni qo‘lga kiritadi.
Jahon chempionati bahslarini www.eswc.com sayti orqali onlayn kuzatib borishingiz mumkin.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
