Kelinlar soch turmagi modaning oldindan aytish qiyin bo‘lgan yo‘nalishi hisoblanadi. Ko‘pchilik kelinlar an’anaviy obrazlar va klassik uyg‘unlikni istasa ham to‘y modasi har yili o‘zining yangi qoidalarini o‘tkazishga harakat qiladi. Keling, 2017-yilda urf bo‘lishi kutilayotgan kelinlar soch turmaklari bilan tanishib chiqamiz.
Yirik gulli bezaklar — kelasi yili haqiqatda mashhurlik qozonadigan bezaklardir. Gulchambarlar, tillaqosh, obodoklar va g‘unchalar bilan bezatish — bularning bari modellar obrazida tez-tez uchrab turadi. Gullar kelinlarning yoshlik va go‘zalligiga urg‘u beradi.
Tabiiy kokillar va soch o‘rimi modalar haftaligining yana bir mashhur yo‘nalishi hisoblanadi. Albatta, sochlarni ideal darajada turmaklash shart emas. Yengil tartibsizlik va hurpaytirish obrazga yanada ko‘rk beradi. Ayniqsa bunday soch turmak och tusdagi va nozik sochlarga qo‘shimcha hajm bag‘ishlaydi.
Agar oddiylikni xush ko‘rsangiz, sizga minimalizm ruhidagi soch turmaklari — o‘rilmay bog‘lab orqaga tashlangan soch (“ot dumi”) yoki yoyilgan kokillarni sinab ko‘rishni tavsiya etamiz. Uzun va qalin soch sohibalariga bu variant juda mos keladi.
50-yillar ruhidagi hashamatli soch turmagi yana to‘y modasi cho‘qqisini egallagan. Merilin Monro, Greys Kelli va Marlen Ditrixning obrazlaridan ilhom olishingiz mumkin.
Kelinlar soch turmaklarini yanada xilma-xil qilish uchun unga yaraqlab turgan toshlarga ega tillaqoshni qo‘shish mumkin. Pastroqdan yig‘ilib, tillaqosh yoki sun’iy gullar hamda boshqa aksessuarlar bilan tang‘ib qo‘yilgan soch turmagi ham ajoyib ko‘rinishga ega bo‘ladi. Bunday soch turmagi uzun soch qizlarga ayniqsa mos keladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)