Toshkentda “Mehnat sohasining istiqboldagi masalalari bo‘yicha milliy muloqot” bo‘lib o‘tdi
Butunjahon munosib mehnat kuni doirasida 7-oktabr, juma kuni O‘zbekiston kasaba uyushmalari federatsiyasi tomonidan ijtimoiy sheriklar va Xalqaro mehnat tashkiloti (XMT) ishtirokida “Mehnat sohasining istiqboldagi masalalari bo‘yicha milliy muloqot” mavzusida konferensiya o‘tkazildi. Bu haqda O‘zbekiston kasaba uyushmalari federatsiyasi matbuot xizmati xabar bermoqda.
Konferensiya davomida “Mehnat va jamiyat”, “Barcha uchun munosib ish o‘rinlari”, “Mehnat va ishlab chiqarishni tashkil etish”, “Mehnat sohasini boshqarish” kabi yo‘nalishlarda bahslar tashkil etildi. Mazkur yo‘nalishlarda O‘zbekistonda zarur choralar ko‘rilayotgani, jumladan, barqaror ish o‘rinlari yaratilayotgani, ijtimoiy himoya tizimi kengaytirilayotgani ta’kidlandi.
Jumladan, har yili 1 millionga yaqin ish o‘rinlari yaratilmoqda. Joylarda ularning chindan ham shakllantirilganligi, munosib mehnat sharoitlari ta’minlangani ustidan jamoatchilik monitoringi o‘rnatilgan. Kasanachilik, hunarmandlik, shaxsiy xo‘jaliklarda chorvachilik bilan shug‘ullanishni rag‘batlantirish orqali bandlikni ta’minlashga e’tibor qaratilmoqda. Shuningdek, iqtisodiyotda band bo‘lganlarning 80 foizini tashkil etuvchi, yalpi ichki mahsulotning 56 foizini ta’minlovchi kichik biznes va xususiy tadbirkorlikni rivojlantirish aholini ish bilan ta’minlashda muhim omil bo‘lmoqda.
O‘zbekistonda munosib mehnat tamoyillarini amalga oshirish uchun davlat, kasaba uyushmalari va ish beruvchilar o‘rtasida samarali ijtimoiy muloqot o‘rnatilgan. Jumladan, hukumat, kasaba uyushmalari federatsiyasi va Savdo-sanoat palatasi o‘rtasida ijtimoiy-iqtisodiy masalalar bo‘yicha bosh kelishuv imzolangan va amaliyotda qo‘llanmoqda. Mamlakatda bolalar mehnatidan foydalanish, mehnat munosabatlarida ish qobiliyatiga aloqador bo‘lmagan alomatlarga qarab kamsitish muammolari mavjud emas. Aholi daromadlari orasida tengsizlik kuchayishiga yo‘l qo‘yilmaydi.
Konferensiya davomida mehnat sohasi yo‘nalishlari bo‘yicha qator takliflar bildirildi. Jumladan, davlat mehnat inspeksiyalari salohiyatini mustahkamlash, ular faoliyatida yangi texnologiyalarni joriy etish, xorijiy davlatlarning bu boradagi tajribasini o‘rganish va tatbiq etish taklif etildi.
Tadbir davomida va joylardan olingan takliflar umumlashtirilishi va tavsiyalar tariqasida Xalqaro mehnat tashkilotiga taqdim etilishi ta’kidlandi. Butunjahon munosib mehnat kuni doirasidagi bu kabi tadbirlar O‘zbekistonning barcha mintaqalarida bo‘lib o‘tdi.
