Saudiya Arabistoni xorijliklarga mamlakatdan chiqqanlik uchun to‘lov joriy qildi

Byudjetga kelib tushadigan neft tushumlari ulushi pasayib borayotgani tufayli, Saudiya Arabistoni hukumati viza yig‘imlari hajmini sezilarli darajada oshirdi, deya xabar bermoqda “TASS”. Endi xorijliklar nafaqat qirollikka kirgani uchun, balki undan chiqqani uchun ham pul to‘laydi.

Gulf News yozishicha, Saudiya hududini tark etishni istagan har bir chet ellik 50 dollar atrofida pul to‘lashi kerak bo‘ladi. Ayni paytda 80 dollarga teng bo‘lgan tranzit vizasi ham ancha oshdi, dengiz sayohatlarida esa port infratuzilmasidan foydalanganlik uchun kishi boshiga 13 dollardan to‘lanadi.

Ikki oyga beriladigan bir martalik kirish vizasi o‘n barobar — 50 dollardan 530 dollargacha oshdi. Har bitta qo‘shimcha oy uchun qirollik mehmoni 26 dollardan to‘lashi kerak. Haj ziyoratchilari uchun esa qirollikka birinchi safar bepul bo‘ladi.

Bundan tashqari, yangi qoidalarga ko‘ra, xorijlik ishchilar mamlakatga kirish uchun 80 dollar to‘lashi kerak, yarim yilga ishchi viza 800 dollar, bir yilga 1333 dollar, ikki yilga esa 2133 dollarni tashkil qiladi.