Angliya futbol uyushmasi (FA) korrupsiyaga aloqadorlikda aybdor deb topilgan hamda iste’foga chiqarilgan Sem Ellardays o‘rnini egallaydigan mutaxassis nomini hali aniqlagani yo‘q, ammo jamoaning vaqtincha ustozi nomini e’lon qildi. Bu haqda “Korrespondent.net” xabar bermoqda.
Angliya yoshlar terma jamoasini boshqargan 46 yoshli mutaxassis Garet Sautgeyt vaqtincha bosh jamoani boshqarib turadi.
Uotfordda tug‘ilgan Sautgeyt futbolchilik faoliyatida davomida “Kristal Pelas”, “Aston Villa” va “Midlsbro” klublarida to‘p surgan.
Sautgeyt Angliya terma jamoasi safida 57 o‘yin o‘tkazib, 2 ta gol urishga muvaffaq bo‘lgan.
Sautgeyt yozda, Sem Ellardays milliy terma bosh murabbiyi etib tayinlanishidan avval Angliya termasini boshqarish imkoniyatiga ega bo‘lgan edi. Biroq o‘shanda u bu taklifni qabul qilmagan edi.
Garet Sautgeyt kamida to‘rtta o‘yinda Angliya termasiga ustozlik qiladi. JCh–2018 saralash turnirida “Uch sherlar”ning navbatdagi raqiblari Malta, Sloveniya, Shotlandiya va Ispaniya bo‘ladi.
Angliya yoshlar terma jamoasini esa Eydi Butroyd qabul qilib oladi.