Yahoo! 500 million foydalanuvchining ma’lumotlari o‘g‘irlanganligini ma’lum qildi

Amerikaning Yahoo! kompaniyasi 2014-yilgi yirik xakerlik hujumi oqibatida 500 million foydalanuvchining shaxsiy ma’lumotlari o‘g‘irlanganligini ma’lum qildi, deb yozadi “Interfaks”.

O‘g‘irlangan axborot ismlar, elektron pochta manzillari, telefon raqamlari, tug‘ilgan kun sanalari va shifrlangan parollar, shuningdek, foydalanuvchi shaxsini aniqlash uchun ishlatiladigan qo‘shimcha maxfiy savollar va ularga javoblarni o‘z ichiga oladi.

Internet-kompaniya matbuot xizmatining ma’lum qilishicha, xakerlar kredit kartalari haqidagi ma’lumotlarni qo‘lga kirita olmagan.

Yahoo! xakerlar qaysidir davlatning ko‘magidan foydalanganligini taxmin qilmoqda. Bu yuz bergani ommaga ma’lum qilingan tarixdagi eng katta kiberhujumdir. Federal qidiruv byurosi mazkur xakerlik hujumi yuzasidan surishtiruv olib borayotganligini tasdiqladi.

Yahoo! 2014-yildan buyon parolini o‘zgartirmagan foydalanuvchilarga parollarini o‘zgartirishni tavsiya qildi.