Американинг Yahoo! компанияси 2014 йилги йирик хакерлик ҳужуми оқибатида 500 миллион фойдаланувчининг шахсий маълумотлари ўғирланганлигини маълум қилди, деб ёзади «Интерфакс».
Ўғирланган ахборот исмлар, электрон почта манзиллари, телефон рақамлари, туғилган кун саналари ва шифрланган пароллар, шунингдек, фойдаланувчи шахсини аниқлаш учун ишлатиладиган қўшимча махфий саволлар ва уларга жавобларни ўз ичига олади.
Интернет-компания матбуот хизматининг маълум қилишича, хакерлар кредит карталари ҳақидаги маълумотларни қўлга кирита олмаган.
Yahoo! хакерлар қайсидир давлатнинг кўмагидан фойдаланганлигини тахмин қилмоқда. Бу юз бергани оммага маълум қилинган тарихдаги энг катта киберҳужумдир. Федерал қидирув бюроси мазкур хакерлик ҳужуми юзасидан суриштирув олиб бораётганлигини тасдиқлади.
Yahoo! 2014 йилдан буён паролини ўзгартирмаган фойдаланувчиларга паролларини ўзгартиришни тавсия қилди.
Изоҳ (0)