Muhammadqodir Abdullayevning muvaffaqiyatini takrorlagan “andijonlik Pakyao”

Rio–2016 Olimpiada o‘yinlarida O‘zbekiston olimpiya terma jamoasiga ilk oltin medalni boks musobaqalarining eng yengil – 49 kilogrammgacha bo‘lgan vazn toifasida ishtirok etgan Hasanboy Do‘stmatov olib keldi.

Sakkiz vazn toifasida sobiq jahon chempioni, filippinlik Menni Pakyaoni kumiri deb hisoblaydigan Hasanboy Do‘stmatov Instagram’dagi sahifasini Manny Hasan Pacquiao Pacman nomi ostida yuritadi. U 1993-yil, 24-iyun kuni Andijon viloyatidagi Buloqboshi tumanida tavallud topgan. Olimpiada chempionligiga qadar o‘zbekistonlik bokschi bir qator musobaqalarda ishtirok etib, yuqori pog‘onalarni zabt etgan.

Hasanboy Do‘stmatov ilk marta 2011-yili yoshlar o‘rtasida o‘tkazilgan O‘zbekiston chempionatida g‘olib bo‘lgan. Tajribasini orttirib borgan bokschi 2012 va 2013-yilda mamlakat birinchiligida tengsiz deb topilgan. 2013-yilning o‘zida Do‘stmatov O‘zbekiston kubogi bahslarida ham g‘olib chiqqan. Shuningdek, ko‘plab xalqaro turnirlarda g‘olib va sovrindorlar qatoridan o‘rin olib kelgan Hasanboy 2013-yili Rossiyaning Qozon shahrida o‘tkazilgan yozgi Universiada o‘yinlarida oltin medalga ega chiqqandi.

Bundan tashqari, 2015-yili Hasanboy Do‘stmatov Bangkokda o‘tkazilgan Osiyo chempionatida shohsupaning eng yuqori pog‘onasidan o‘rin olgan. Shuningdek, Butunjahon boks seriyasi (WSB)ning VI mavsumidan boshlab Hasanboy Do‘stmatov yangi tashkil topgan Uzbek Tigers (“O‘zbek yo‘lbarslari”) jamoasiga taklif etildi va o‘zining g‘alabasi bilan jamoaning musobaqa yarim finaliga chiqishiga o‘z hissasini qo‘shdi. Bunga qadar u Ukraine Otamans (“Ukraina atamanlari”) safida bir nechta jang o‘tkazib, muvaffaqiyatga erishgandi.

O‘zbekistonlik bokschi Rio–2016 Olimpiada o‘yinlarining yo‘llanmasi uchun Xitoyning Sian’An shahrida bo‘lib o‘tgan Osiyo va Okeaniya qo‘shma litsenzion turnirida oltin medalga ham sazovor bo‘lib, Olimpiada o‘yinlarida ishtirok etish huquqini qo‘lga kiritgan edi.

Rio–2016 Olimpiadasi chempionligi yo‘lida o‘zbekistonlik bokschi avval meksikalik Xoselito Velaskesni (3:0), keyin esa qozog‘istonlik Birjan Jakipovni (3:0) ishonchli tarzda mag‘lubiyatga uchratib, yarim final yo‘llanmasiga ega bo‘ldi. Yarim finalda Hasanboy Do‘stmatov AQSh vakili Niko Ernandesni (3:0) qiyinchiliksiz taslim etib, musobaqaning finaliga yo‘l olgan va kamida bronza medalni naqd qilgandi.

Olimpiada finalida o‘zbekistonlik bokschi tajribali kolumbiyalik charm qo‘lqop egasi Yuberxen Martinesga qarshi jang olib bordi. Hayajonli o‘tgan bahsda Hasanboy Do‘stmatov barcha raundlarda ustunlik ko‘rsatib, o‘z vaznida tengsiz ekanini isbotladi.

• Rio–2016 Olimpiadasida O‘zbekistonga oltin medalni olib kelgan Hasanboy Do‘stmatovning final jangidan fotoreportaj

• Olimpiada chempioni Hasanboy Do‘stmatov: Bu onlarni 30 millionli xalq kutgan edi

So‘nggi marotaba boks bo‘yicha Olimpiada oltin medalini Andijon boks maktabining tarbiyalanuvchisi Muhammadqodir Abdullayev, 2000-yili Sidneyda o‘tkazilgan Olimpiada o‘yinlarida qo‘lga kiritgan edi. 16 yildan so‘ng aynan andijonlik bokschi Muhammadqodir Abdullayevning natijasini takrorlash baxtiga musharraf bo‘ldi.

• “Hasanboyning g‘alabasidan so‘ng butun mahalla ko‘chada”. Olimpiada chempioni Do‘stmatovning xonadonidan 15-avgustga o‘tar kechasi tayyorlangan fotoreportaj

Final jangidan avval bergan intervyusida Hasanboy Do‘stmatov Muhammadqodir Abdullayevni ham eslab o‘tdi. “O‘sha oltin medal hozirgacha yagona bo‘lib keldi. Men ham Muhammadqodir aka kabi chempion bo‘lishni istayman. G‘alabam qolgan bokschilarni ruhlantirishini xohlardim” – deya fikr bildirgan edi Do‘stmatov.

• Hasanboy Do‘stmatov: Muhammadqodir Abdullayev kabi chempion bo‘lishni istayman