Shveysariyaning Lozanna shahridagi federal sudda balandlikka sakrash bo‘yicha ikki karra olimpiya chempioni Yelena Isinbayeva va 110 metrga to‘siqlar osha yugurish bo‘yicha jahon chempioni Sergey Shubenkovdan ularning Rio—2016 Olimpiadasidan chetlatilishi yuzasidan apellyatsiya olindi. Bu haqda sudning rasmiy vakili Pete Josi ma’lum qildi, deya xabar beradi “TASS”.
Isinbayeva va Shubenkovdan Sport arbitraj sudi (CAS) qaroriga nisbatan apellyatsiya borligini tasdiqlashini bildirgan rasmiy vakil bu ish yuzasidan boshqa tafsilotlar, jumladan, shikoyatlar qachon taqdim etilgani va ular bo‘yicha eshituvlar o‘tkaziladigan muddat haqida ma’lumot bermadi.
Sport arbitraj sudi 21-iyul kuni Rossiya Olimpiya qo‘mitasi va 68 rossiyalik atletning yengil atletika federatsiyalari xalqaro assotsiatsiyasi (IAAF) tomonidan chiqarilgan Rio Olimpiadasidan chetlatish to‘g‘risidagi qarorga nisbatan da’vosini bir ovozdan rad etdi. CAS qabul qilgan mazkur qaror bo‘yicha Shveysariya federal sudida 30 kun mobaynida shikoyat keltirish mumkin.