“Rio—2016” tashkilotchilari stadionlarga kirishdagi navbatlar uchun uzr so‘radi

Rio-de-Janeyrodagi Olimpiada tashkilotchilari sport muxlislaridan XXXI yozgi O‘yinlar doirasidagi musobaqalar bo‘lib o‘tayotgan stadionlarga kirishda navbatlar yuzaga kelayotgani uchun uzr so‘radi, deb yozadi “TASS”. Tegishli bayonotni “Rio—2016” tashkiliy qo‘mitasi matbuot kotibi Mario Andrada berdi.

“Jaziramada navbatlarda turishga majbur bo‘lganlardan uzr so‘rashimiz kerak. Biz tomoshabinlarni qabul qilingan xavfsizlik mezonlariga muvofiq tekshirish jarayonini tezlashtirishga harakat qilamiz, chunki kimdir musobaqalarni ko‘rmay qolishini istamaymiz”, — dedi u.

Guvohlar so‘zlariga ko‘ra, ba’zi olimpiya musobaqalarini ko‘rish uchun ikki soatlik navbatda kutishga to‘g‘ri kelgan. Braziliya OAVlari ushbu vaziyatni huquq-tartibot organlarining Olimpiya o‘yinlari xavfsizligini ta’minlovchi bo‘linmalari o‘rtasida koordinatsiya yo‘qligi bilan izohlamoqda.