14-iyun, seshanba kuni Braziliyaning Rio-de-Janeyro shahrida XXXI yozgi Olimpiada va XV Paralimpiya o‘yinlari medallarining taqdimoti bo‘lib o‘tdi, deb xabar bermoqda O‘zbekiston Milliy olimpiya qo‘mitasi matbuot xizmati. Tadbirda Xalqaro olimpiya qo‘mitasining prezidenti Tomas Bax ham ishtirok etdi.
Medallar Braziliyada ishlab chiqarilgan bo‘lib, jami 2488 dona (812 ta oltin, 812 ta kumush va 864 ta bronza)ni tashkil etadi. Har bir medalning vazni 500 gramm atrofida.
Olimpiada o‘yinlari medallarining bir tomonida an’anaga ko‘ra g‘alaba xudosi – Nika tasvirlangan. Unda Olimpiya halqasi hamda XXXI Olympiada Rio 2016 so‘zi uyg‘unlashgan. Medalning orqa tarafida esa 2016-yilgi Rio-de-Janeyro Olimpiya o‘yinlarining timsoli tasvirlangan.
Paralimpiya medallarining old tomonida Rio–2016 Paralimpiya o‘yinlari timsoli, orqa tomonida esa Paralimpiya tashkiloti emblemasi tasvirlangan. Shuningdek, ko‘zi ojizlar uchun maxsus yozuv aks ettirilgan.
Quyidagi videolavha orqali medallarning tayyorlanish jarayonini ko‘rishingiz mumkin bo‘ladi.
Izoh (0)