O‘zbekiston oliy ta’lim tizimi uchun xorij o‘quv va ilmiy adabiyotini xarid qilish choralari tasdiqlandi

O‘zbekiston hukumati shu yil 24-maydagi qarori bilan mamlakat oliy ta’lim tizimi uchun xorij o‘quv va ilmiy adabiyotini xarid qilish choralarini tasdiqladi. Bu haqda “Gazeta.uz” xabar bermoqda.

Hujjatda Vazirlar Mahkamasi tasdiqlaydigan ro‘yxatga asosan tender savdolarisiz 5864 nomdagi adabiyotni xarid qilish ko‘zda tutilgan. Olib kiriladigan kitoblar 2020-yilgacha bojxona to‘lovlaridan (bojxona yig‘imlaridan tashqari) ozod qilindi.

“O‘zsanoateksport” kompaniyasi va Milliy kutubxonaga Oliy va o‘rta maxsus ta’lim vazirligi bilan hamkorlikda ikki hafta muddatda xorij adabiyotini xarid qilish bo‘yicha distribyutorlik kompaniyalari va chet el nashriyotlari (mualliflari) bilan to‘g‘ridan-to‘g‘ri muzokaralar olib borish topshirildi.

31-maygacha oliy o‘quv yurtlari bakalavriati birinchi bosqich talabalari, shuningdek, rahbar va pedagog kadrlar qayta tayyorlash va malakasini oshirish kurslari tinglovchilariga 980 nomdagi adabiyot yetkazib berish uchun shartnomalar tuzilishi lozim.

Xorij adabiyotini sotib olish uchun budjet mablag‘laridan tashqari chet el grantlarini ham jalb etish ko‘zda tutilmoqda.