O‘zbekiston Respublikasi Vazirlar Mahkamasining 20-maydagi qarori (pdf) bilan 2016—2020-yillar davrida Toshkent hayvonot bog‘ini rivojlantirish konsepsiyasi tasdiqlandi, deb yozadi “Gazeta.uz”.
Hujjat Toshkent hayvonot bog‘ini zamonaviy madaniy-tomosha va ilmiy-ma’rifiy davlat muassasasi sifatida rivojlantirish, hayvonot bog‘i kolleksiyasini noyob va ekzotik hayvonlar bilan to‘ldirishni ta’minlash, shuningdek, hayvonlarni saqlash uchun qulay shart-sharoitlar yaratish maqsadida qabul qilindi.
Qarorda hayvonot bog‘i hududida yuqori texnologiyali “Akvanarium” qurish va dengiz jonivorlari va baliqlaridan iborat ekspozitsiya yaratish; faunistik tadqiqotlarni rivojlantirish uchun zamonaviy ilmiy majmua, shuningdek, zoologiya va zoomuhandislik laboratoriyalari barpo etish; hayvonot bog‘i veterinariya shifoxonasining texnik bazasini mustahkamlash va zamonaviy tibbiy uskunalar bilan jihozlash nazarda tutilgan.
Shuningdek, hayvonot bog‘i hududida audio-gid xizmatlarini tashkil etish, hayvonot bog‘ining nayvonot dunyosi to‘g‘risida zarur obzorli axborotni taqdim etgan holda yo‘l ko‘rsatuvchi — elektron xaritani tashkil etish, jumladan, hayvonot bog‘ining butun hududi bo‘yicha elektron axborot displeylarini qo‘llash, hayvonot bog‘i ma’muriy-boshqaruv binolarini keng polosali Internet bilan ta’minlash vazifalari belgilandi.
Qarorda Samarqand va Farg‘ona shaharlarida Toshkent hayvonot bog‘ining filiallarini qurish va Termiz shahri hayvonot bog‘ini rekonstruksiya qilish ko‘zda tutilgan.
Izoh (0)