O‘tgan dam olish kunlarida Tog‘li Qorabog‘da kuchaygan to‘qnashuvlar natijasida kamida 33 kishi halok bo‘ldi, 200 dan ziyod kishi yaralandi. Bunday ma’lumotlarni 3-aprel, yakshanba kuni BMTning Gumanitar masalalar koordinatsiyasi bo‘yicha boshqarmasi keltirib o‘tdi, deb yozadi “TASS”.
“Armaniston va Ozarbayjondagi rasmiy manbalarga ko‘ra, jangovar harakatlar natijasida kamida 30 askar va 3 nafar tinch aholi vakili nobud bo‘lgan. Yaralanganlar soni rasman tasdiqlanmagan. Norasmiy manbalarga ko‘ra, ushbu raqam 200 dan ortiq deya baholanmoqda”, — deyiladi hujjatda.
Boshqarma ma’lumotlariga muvofiq, harbiy harakatlar bo‘lib o‘tgan qishloqlarda 14,4 mingga yaqin kishi yashaydi.
“Ozarbayjon hukumati odamlar mamlakat ichida ko‘chirilmaganini ma’lum qildi, Armaniston tomonidan esa 50 kishi Yerevandan vaqtinchalik boshpana so‘ragan. Har ikkala hukumat ham xalqaro gumanitar yordamga muhtoj emasligini aytdi”, — deya ta’kidlanadi ma’ruzada.
Tog‘li Qorabog‘da nizo tomonlari o‘rtasidagi chegarada 2-aprelga o‘tar kechasi vaziyat keskinlashdi: shafqatsiz to‘qnashuvlar boshlandi, shundan so‘ng tomonlar bir-birini yarashuv sulhini buzishda aybladi.