Fil laqabli sug‘ur erta bahorni bashorat qildi

AQShning Pensilvaniya shtati, Panksatoni shahridagi Fil laqabli sug‘ur bu yil bahor faslining erta kelishini bashorat qildi. Bu haqda Meduza xabar qilmoqda.

Qish mavsumining davom etish muddatiga aniqlik kiritish maqsadida har yilda tashkil etiladigan marosimda, sug‘ur uyasidan chiqib kelib, o‘zining soyasini ko‘rmadi. Aks holda, Filning bashoratidan kelib chiqib, qish yana olti hafta davom etishi kerak edi.

Sug‘urning xatti-harakatiga qarab ob-havoni 2-fevral kuni bashorat qilish an’anasi Panksatoni shahrida 130 yildan beri mavjud. Bosh rolni taniqli aktyor Bill Myurrey ijro etgan “Sug‘ur kuni” filmining sharofati bilan bu an’ana butun jahonga mashhur bo‘ldi.

Eslatib o‘tamiz, 2-fevraldan e’tiboran Buyuk Britaniyaning Sky telekanali shu kuni AQSh va Kanadada nishonlanadigan sug‘ur kuni bayramiga bag‘ishlangan maxsus efiri haqida xabar qilingan edi.