Saudiya Arabistoni rasmiylari Abxada sodir etilgan terakt tashkilotchilari haqidagi ma’lumot uchun 1 million dollar va’da qildi

Saudiya Arabistoni rasmiylari o‘tgan yil avgustida Abxa shahrida sodir etilgan portlash tashkilotchilarini qo‘lga olishda yordam berganlik uchun 5 million riyol (1,33 million dollar) to‘lashga tayyor. Shuningdek, mamlakat hududida amalga oshirilishi rejalashtirilayotgan terakt haqidagi ma’lumot uchun 7 million riyol (1,85 million dollar) beriladi. Bu haqda “TASS” xabar qilmoqda.

Mamlakat ichki ishlar vazirligi ma’lumotiga ko‘ra, Asir viloyati ma’muriy markazi Abxadagi portlashlar ortida turgan terrorchi guruhga mansub to‘qqiz kishi aniqlangan.

2015-yil avgustida Saudiya Arabistoni maxsus bo‘linmasi bazasi qoshidagi masjidda terrorchi-xudkush o‘zini portlatib yuborgan, buning oqibatida bo‘linmaning 17 nafar xodimi halok bo‘lgan, o‘nlab kishilar jarohat olgandi.