AQShning Moskvadagi elchixonasi qarshisiga Obama portreti tushirilgan Killer bannerini osib qo‘yishdi

AQShning Moskvadagi elchixonasi qarshisidagi turar-joy binosiga Amerika prezidenti Barak Obama portreti va Killer (“qotil”) yozuvi tushirilgan plakat osib qo‘yildi, deya xabar bermoqda “RBK”.

Ushbu aksiya uchun javobgarlikni “Glavplakat” art-jamiyati tarafdorlari o‘z bo‘yniga oldi. Guruh saytida yozilishicha, o‘n metrli banner “AQSh hukumatining xorijiy davlat hududiga navbatdagi harbiy hujum bo‘yicha rejalari”ga bag‘ishlangan.

AQSh elchixonasidagilar hozircha paydo bo‘lgan xabarni tekshirishayotganini ma’lum qildi.

Nashr eslatishicha, AQSh elchixonasi qarshisida joylashgan binodagi plakat Pentagon rahbari Eshton Karterning Suriya va Iroqda quruqlikdagi qo‘shinlardan foydalanish zarurati haqidagi gaplaridan bir necha kun o‘tib paydo bo‘ldi.